राज्यातील सर्वांत मोठा सौरऊर्जा प्रकल्प लासलगाव येथे कार्यान्वित

नाशिक: कृषिपंपांना दिवसा वीज मिळावी, या शेतकऱ्यांच्या बहुप्रतीक्षित मागणीची पूर्तता करण्यासाठी सरकार आणि महावितरणकडून विविध उपाययोजना आखण्यात येत आहेत. त्यातील ''मुख्यमंत्री सौर कृषी वाहिनी'' या योजनेअंतर्गत स्वमालकीच्या जागेवरील महावितरणचा राज्यातील सर्वांत मोठा सौरऊर्जानिर्मिती प्रकल्प नाशिक जिल्ह्यातील लासलगाव येथे नुकताच कार्यान्वित करण्यात आला. जिल्ह्यात सध्या ३ प्रकल्पांमधून ३ मेगावाॅटपेक्षा अधिकची सौरऊर्जा निर्माण होत आहे.   मुख्य अभियंता श्री. ब्रिजपालसिंह जनवीर, अधीक्षक अभियंता श्री. प्रवीण दरोली यांच्या प्रमुख उपस्थितीत हा प्रकल्प नुकताच कार्यान्वित करण्यात आला. या वेळी कार्यकारी अभियंता श्री. मधुसूदन वाढे, श्री. सुरेश सवाईराम, श्री. मनीष ठाकरे, श्री. अनिल थोरात, उपकार्यकारी अभियंता श्री. प्रवीण सोनवणे यांच्यासह अभियंते व कर्मचारी उपस्थित होते.  दिवसा वीज उपलब्ध करून देण्याची शेतकऱ्यांची अनेक दिवसांपासूनची मागणी; तसेच कृषीक्षेत्राला माफक दरात व आवश्यकतेनुसार वीजपुरवठा करण्याच्या उद्देशाने राज्य सरकारने मुख्यमंत्री सौर कृषी वाहिनी योजना हाती घेतली. महानिर्मिती व महाऊर्जा यांच्या संयुक्त विद्यमाने सार्वजनिक व खासगी सहकार्यातून या योजनेतील प्रकल्प कृषीपंप वापर अधिक असलेल्या ठिकाणी उभे राहत आहेत. लासलगाव उपकेंद्र परिसरात जवळपास २० हजार चौरस मीटर जागेवर उभारण्यात आलेला १.३ मेगावॉट क्षमतेचा सौरऊर्जा प्रकल्प महावितरणच्या स्वमालकीच्या जागेतील राज्यातील मोठा प्रकल्प आहे.  यापूर्वी वावी येथे ०.७३ मेगावॉट क्षमतेचा सौरऊर्जा प्रकल्प सप्टेंबर-२०१८ मध्ये कार्यान्वित झाला आहे, तर वणी येथील ०.९९ क्षमतेचा प्रकल्प मे-२०१९ च्या पहिल्या आठवड्यात सुरू झाला. याशिवाय गिरणारे उपकेंद्र परिसरात ०.७९ मेगावॉट क्षमतेच्या प्रकल्पाचे काम अंतिम टप्प्यात असून, लवकरच वीजनिर्मिती अपेक्षित आहे. अहमदनगर जिल्ह्यातील संगमनेर विभागात आश्वी खुर्द येथील ०.८८ व कोळपेवाडी येथील ०.६७ मेगावॉट क्षमतेच्या प्रकल्पांचे कामही अंतिम टप्प्यात आहे. हे प्रकल्प कार्यान्वित झाल्यानंतर नाशिक परिमंडळात महावितरणच्या जागेतील प्रकल्पातून ५.३६ मेगावा ट सौरऊर्जा वापरात येईल. प्रकल्प परिसरात कृषिपंपांचा भार १५.६५ च्या दरम्यान आहे.