पुणे विभागातील ८५ गावे, ३१२ वाड्यांमध्ये पाणीटंचाई

पुणे  : पूर्वमोसमी पावसाने दणक्‍यात हजेरी लावली असली तरी विभागातील पुणे, सातारा जिल्ह्यांत तीव्र पाणीटंचाई आहे. पुणे, सातारा, सांगली जिल्ह्यातील २० तालुक्‍यांमधील ८५ गावे ३१२ वाड्यांच्या टंचाईग्रस्त भागाची तहान भागविण्यासाठी ७५ टॅंकर सुरू करण्यात आल्याची माहिती विभागीय आयुक्त कार्यालयातर्फे देण्यात आली. पाऊस सुरू झाला असला तरी पाणीटंचाई दूर होण्यासाठी मोठ्या पावसाची आवश्‍यकता आहे.

विभागात यंदा सातारा जिल्ह्याला टंचाईच्या सर्वाधिक झळा बसत आहेत. साताऱ्यातील खटाव, माण, कोरेगाव, पाटण, महाबळेश्‍वर, खंडाळा तालुक्‍यांसह ११ गावांत पाणीटंचाई जाणवत आहे. जिल्ह्यातील ५१ गावे, १८१ वाड्यांमधील सुमारे ६० हजार लोकसंख्या आणि १२ हजार जनावरांना पाणीपुरवठा करण्यासाठी ४३ टॅंकरने पाणीपुरवठा करावा लागत आहे.

पुणे जिल्ह्यातील आंबेगाव, जुन्नर, खेड, भोरसह नऊ तालुक्‍यांतील २९ गावे १८१ वाड्यांना २९ टॅंकर, तर सांगली जिल्ह्यातील खानापूर तालुक्‍यातील ५ गावे एका वाडीला तीन टॅंकरद्वारे पाणीपुरवठा करण्यात येत आहे. कोल्हापूरच्या दुर्गम भागात पाणीपुरवठा करण्यासाठी दोन स्त्रोत अधिग्रहित करण्यात आले आहेत.

विभागात गतवर्षी जूनच्या सुरवातीला पाणीटंचाईची तीव्रता खूपच अधिक होती. विभागात ४११ गावे आणि २५०५ वाड्यांना ३८७ टॅंकरने पाणीपुरवठा करावा लागत होता. सांगलीतील १७६ गावे १३१२ गावांना १८० टॅंकरने, साताऱ्यातील १७० गावे ६५१ वाड्यांना १२९ टॅंकरने, पुणे जिल्ह्यातील ६३ गावे ५३६ वाड्यांना ७६ टॅंकरने तर सोलापूरातील २ गावे ३ वाड्यांना २ टॅंकरने पाणीपुरवठा करण्यात येत होता, असे विभागीय आयुक्त कार्यालयातर्फे सांगण्यात आले. जलयुक्त शिवार योजनेतील कामांमुळे यंदा भूजल पातळी चांगली असून, धरणांमध्येही चांगला पाणीसाठा असल्याने पाणीटंचाई तुलनेने खूपच कमी आहे.