महाबळेश्र्वरमध्ये ३५०० एकरांवर स्ट्रॉबेरी लागवड

सातारा  ः महाबळेश्वरसह वाई, जावली, कोरेगाव या तालुक्‍यांत स्ट्रॉबेरी लागवडीची कामे उरकली आहेत. जिल्ह्यात ३२०० ते ३५०० एकरांवर स्ट्रॅाबेरी लागवड झाली असल्याचा अंदाज व्यक्त केला जात आहे. हंगामाच्या अंतिम टप्प्यात पाणीटंचाई भासण्याची शक्यता निर्माण झाली आहे.  

राज्यात महाबळेश्वर तालुक्‍यात सर्वाधिक अडीच ते तीन हजार एकर तर वाई, जावली, कोरेगाव या तीन तालुक्‍यांत सुमारे एक हजार एकर क्षेत्रावर स्ट्रॉबेरीची लागवड केली जाते. सातारा, खटाव, पाटण या तालुक्‍यांतही काही प्रमाणात स्ट्रॉबेरीची लागवड होते. स्ट्रॉबेरी लागवडीसाठी परदेशातून सुमारे १४ लाख मातृरोपे आणण्यात आली होती. या मातृरोपांद्वारे शेतात लागवडीसाठीच्या रोपांची निर्मिती बहुतांशी हरितगृहात करण्यात आली आहे. या हंगामात स्ट्रॉबेरीची मातृरोपे येण्यास काहीसा वेळ झाल्याने लागवडीसाठीची रोपे वेळेत तयार व्हायला विलंब झाला. यामुळे सुमारे एक महिना लागवड उशिरा झाली. अॅाक्टोबर माहिन्यात लागवडीस प्रारंभ झाला होता.

लागवडीच्या कालावधीत महाबळेश्वर तालुक्यात अनेक ठिकाणी पाऊस झाल्याने काही कालावधीसाठी स्ट्रॉबेरी लागवड ठप्प झाली. पावसाने उघडीप दिल्यावर शेतात वाफसा येईल तसतशी लागवड होत राहिली. महाबळेश्वर तालुक्‍यात सर्वसाधारण अडीच हजार एकर क्षेत्रावर तर वाई, जावली, कोरेगाव या तीन तालुक्‍यांत ८०० ते एक हजार एकर क्षेत्रावर स्ट्रॉबेरी लागवड झाली असल्याचे शेतकऱ्यांनी सांगितले. सध्या पाण्याची परिस्थिती बघता हंगामाच्या अंतिम टप्प्यात पाण्याची टंचाई भासण्याची शक्यता आहे.

डिसेंबरमध्ये प्रमुख बहर बाजारात उशिरा लागवड झाल्याने यंदाच्या दिवाळीत स्ट्रॉबेरी उपलब्ध झाली नाही. सप्टेंबर महिन्यात होणारी लागवड अॅाक्टोबर महिन्यात झाल्याने दिवाळी सणादरम्यान पर्यटकांकडून मिळणाऱ्या चांगल्या म्हणजेच किलोला ४०० ते ५०० रुपये दरापासून वंचित राहावे लागले आहे. याचा शेतकऱ्यांना आर्थिक फटका बसला आहे. डिसेंबर, जानेवारी महिन्यात स्ट्रॉबेरी प्रमुख बहर बाजारात येणार आहे.