धुळे जिल्ह्यातील पिकांना पाण्याचा ताण

धुळे : जिल्ह्यात ज्वारीचे पीक शिंदखेडा, धुळे भागांत अधिक आहे. बाजरीही या भागात आहे. सोयाबीनचे पीक शिंदखेडा व शिरपुरातील काही गावांमध्ये आहे. पाणीटंचाईसोबतच पिकांची स्थिती नाजूक बनत असल्याने शेतकरी हवालदील झाले आहेत.

मागील १२ दिवसांपासून धुळे जिल्ह्यातील कुठल्याही तालुक्‍यात पाऊस झालेला नाही. पावसाची प्रतीक्षा शेतकरी करीत आहेत. मागील महिन्यात मूग व उडदाला पावसाचा खंड पडल्याने फटका बसला आहे. आता ज्वारी, बाजरी, सोयाबीन, कोरडवाहू कापूस पिकाचे नुकसान होत आहे. कापसाची जवळपास दोन लाख हेक्‍टर क्षेत्रावर लागवड झाली आहे. एकूण चार लाख ३० हजार हेक्‍टवर खरीप पिके आहेत. यात तृणधान्याची पेरणी जवळपास एक लाख हेक्‍टवर झाली होती. प्रमुख पिकांची स्थिती नाजूक असल्याने शेतकऱ्यांना आर्थिक फटका बसेल, अशी स्थिती आहे.

ज्या शेतकऱ्यांकडे सिंचनाची सुविधा आहे, त्या शिरपूर व शिंदखेडा भागांतील कापूस, सोयाबीन उत्पादकांनी पिकांचे सिंचन सुरू केले आहे. काही शेतकऱ्यांनी तुषार सिंचन संच सोयाबीनमध्ये सुरू केले आहेत; परंतु कोरडवाहू सोयाबीन, कापूस उत्पादकांना पावसाची प्रतीक्षा करण्याशिवाय पर्याय नाही. कोरडवाहू कापूस पिकात पाते, फुले गळत आहेत. रोज सकाळपासूनच ऊन तापते. यामुळे जमिनीत किरकोळही वाफसा नाही. मुरमाड जमिनीत पिकांची स्थिती अधिकच बिकट बनत आहे. जिल्ह्यातील कापडणे, न्याह ळोद, जापी, लामकानी, नेर आदी भागांतील शेतकऱ्यांनी कांदा पिकात सिंचन सुरू केले आहे. काही शेतकऱ्यांनी बाजरीला पट पद्धतीने पाणीही दिले आहे. जेवढा पावसाचा खंड वाढेल, तेवढी स्थिती बिकट बनेल, असे शेतकऱ्यांचे म्हणणे आहे.