सातारा ः जिल्ह्यातील महाबळेश्वरसह अन्य तालुक्यांत हंगामाच्या सुरवातीपासून स्ट्रॉबेरीचे दर समाधानक राहिले आहेत. सध्या हंगामाचा पाचवा बहर सुरू झाल्याने प्रक्रियेला जाणारा स्ट्रॉबेरीच्या प्रमाणात वाढ झाली आहे. सध्या महाबळेश्वरसह अन्य तालुक्यांतून प्रतिदिन ७० ते ७५ टन स्ट्रॉबेरी विक्रीसाठी जात आहे.
जिल्ह्यात महाबळेश्वर तालुक्यासह जावळी, वाई, कोरेगाव, सातारा तालुक्यात परतीच्या पावसामुळे स्ट्रॉबेरीच्या क्षेत्रात घट झाली होती. महाबळेश्वर तालुक्यात सर्वधिक २५०० एकर; तर अन्य तालुक्यांत सुमारे एक हजार एकर अशी एकूण साडेतीन हजार एकर क्षेत्रावर स्ट्रॉबेरीची लागवड झाली आहे. या हंगामात थंडीचे प्रमाण चांगले राहिल्याने कीड व रोगांचा प्रादुर्भाव कमी झाला आहे.
हंगामाच्या सुरवातीस आलेली स्ट्रॉबेरी आकाराने मोठी व चवीला उत्तम असल्याने त्यास मागणी जास्त असते.
सध्या शेतकऱ्यांना फ्रेश स्ट्रॉबेरीस ६० ते ६५ रुपये प्रतिकिलो दर मिळत असून, दिवसाकाठी ७० ते ७५ टन स्ट्रॉबेरीची महाबळेश्वर तालुक्यातून विक्री केली जाते. सध्या ही स्ट्रॉबेरी मुंबई, पुणे, बेंगळूर, हैदराबाद, कोलकता, रांची, गोवा आदी मोठ्या शहरांत विक्रीसाठी जात आहे.
पाचवा बहर सुरू झाल्याने प्रक्रियासाठी स्ट्रॉबेरी पाठवण्याचे प्रमाण वाढले आहे. सध्या प्रक्रियेसाठी प्रतिकिलो ४० ते ३२ रुपये दर शेतकऱ्यांना मिळत आहे. उष्णतेत वाढ होऊ लागल्याने; तसेच सलग सुट्या लागून येत असल्याने पर्यटक ओढा महाबळेश्वर, पाचगणी शहराकडे वाढला आहे; तसेच शेतकऱ्यांकडून स्ट्रॉबेरी खरेदी करण्यासाठी व्यापारी दाखल झाले आहेत. मात्र शेतकरी पर्यटकांनाच स्ट्रॉबेरीची थेट विक्री करण्यावर भर देत आहेत. मोठे शेतकरी बॉक्स पॅकिंग करून स्ट्रॉबेरी पाठवत असल्यामुळे त्यांना चांगला दर मिळण्यास मदत होत आहे.