पीएनबी बॅंक व्यवस्थापकांवर गुन्हे दाखल करा : बांगर

अमरावती ः पीकविम्याच्या रकमेतून पीककर्जाची कपात करणाऱ्या परतवाडा येथील पंजाब नॅशनल बॅंकेच्या व्यवस्थापकाविरोधात गुन्हा दाखल करण्याचे आदेश जिल्हाधिकारी अभिजित बांगर यांनी दिले आहेत. अचलपूर उपविभागीय पोलिस अधिकाऱ्यांना हे आदेश देण्यात आले.

अचलपूर तालुक्‍यातील बोरगाव येथील जवंजाळ नामक शेतकऱ्यांच्या बॅंक खात्यावर पीकविम्याची रक्‍कम जमा करण्यात आली होती. या रकमेतून पीककर्जाची कपात बॅंक व्यवस्थापनाकडून करण्यात आली. या संदर्भाने शेतकऱ्याने आमदार बच्चू कडू, जिल्हाधिकारी अभिजीत बांगर यांच्याकडे तक्रार केली. जिल्हाधिकाऱ्यांनी यापूर्वीच बोंड अळी, पीकविमा तसेच इतर नैसर्गिक आपत्तीच्या भरपाईपोटी मिळणारे पैसे पीककर्जापोटी कपात न करण्याचे लेखी व तोंडी आदेश जिल्हाभरातील बॅंकांना दिले होते. परंतु मुजोर बॅंक व्यवस्थापनाकडून याकडे दुर्लक्ष करण्यात आले. आमदार कडू यांनी या संदर्भाने जिल्हाधिकारी बांगर यांची भेट घेत हा मुद्दा उपस्थित केला. त्याची दखल घेत जिल्हाधिकारी अभिजित बांगर यांनी तत्काळ परतवाडा येथील पंजाब नॅशनल बॅंकेच्या व्यवस्थापकाविरोधात गुन्हे दाखल करण्याचे आदेश दिले.