कोल्हापूर : गाय दुधाचे कमी केलेले दर पूर्ववत करण्यासाठी शासनाने प्रतिलिटर दुधाला पाच रुपये अनुदान दिले पाहिजे. अन्यथा १ डिसेंबरपासून राज्यातील दूध संकलन बंद केले जाईल, असा इशारा सहकारी व खासगी दूध संघांच्या प्रतिनिधींनी बुधवारी (ता. ८) शासनाला दिला. शासनाला अनुदान देणे जमत नसेल तर दूध पावडर तयार करण्यासाठी खर्च द्यावा किंवा राज्यात अतिरिक्त होणारे दूध शासनाने स्वत: खरेदी करावे, अशी मागणीही दूध संघांच्या प्रतिनिधींनी केली.
येथे कोल्हापूर, सांगली, सातारा व पुणे जिल्ह्यातील सहकारी व खासगी दूध संघांच्या प्रतिनिधींची बैठक झाली. त्यानंतर या प्रतिनिधींनी पत्रकारांशी संवाद साधला.
राजारामबापू पाटील संघाचे अध्यक्ष विनायकराव पाटील म्हणाले, दुधाला जादा दर मिळाला पाहिजे, यात शंका नाही. शेतकऱ्यांच्या खिशात चार पैसे गेले पाहिजेत. पण, सध्या दूध पावडर, लोणी, तुपाची मागणी काय आहे. याचा वास्तव विचार शासनाने केला पाहिजे. राज्यात प्रतिदिन 2 कोटी 87 लाख लिटर दुधाचे उत्पादन होत आहे. त्यातील सुमारे 2 कोटी लिटर दूध बाजारात विक्रीसाठी उपलब्ध होते.
राज्यात सध्या दुधाचे 60 टक्के खासगी क्षेत्रात व 40 टक्के सहकारी क्षेत्रात संकलन होत आहे. यापैकी सर्वाधिक दुधाची पावडर होते; तर उर्वरित दुधाची थेट विक्री केली जाते. राज्यात 11 कोटी 24 लाख लोकसंख्या आहे. या पैकी ग्रामीण भागात 6.15 कोटी लोखसंख्या असून 5.9 कोटी लोक शहरात राहतात. दरम्यान, संकलित होणाऱ्या जादा दुधापैकी अतिरिक्त ठरणाऱ्या दुधाची भुकटी केली जाते.
आता जागतिक पातळीवरच या बुकटीचे दर कमी झाले आहेत. लोणी व तुपाचेही अतिरिक्त उत्पन्न असल्याने त्याचा उठाव होत नाही. प्रसंगी या दुधाचे दर कमी होत आहेत. तरीही गायीच्या दुधाचे दर कमी करू नये यासाठी शेतकऱ्यांकडून प्रयत्न सुरू आहेत. शासनाने दर वाढीबाबत किंवा निश्‍चित देण्यासाठी प्रतिलिटर मागे 5 रुपये अनुदान द्यावे, अनुदान देणार नसाल तर पावडर निर्मितीसाठी येणारा खर्च द्यावा किंवा राज्यात अतिरिक्त संकलित होणारे दूध स्वत: खरेदी करावे.
शासन कोणताही अभ्यास न करता केवळ राजकारण करत असल्यामुळे संघ आणि शेतकरी अडचणीत येत असल्याचे मतही यावेळी व्यक्त करण्यात आले. यावेळी एनडीडीबीचे अध्यक्ष अरुण नरके, महानंदचे उपाध्यक्ष डी. के. पवार, फलटण जिल्हा दूध संघाचे रणजित निंबाळकर, गोकूळचे अध्यक्ष विश्‍वास पाटील, भारत डेअरीचे किरीट मेहता, सोलापूर दूध संघाचे मारुती लव्हटे, पुणे जिल्हा दूध संघाचे संचालक गोपाळराव मस्के, वारणा दूध संघाचे कार्यकारी संचालक मोहन निडूरकर, कराड येथील कोयना दूधचे अमोल गायकवाड उपस्थित होते.
अशा आहेत मागण्या
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.