साखर निर्यात नियोजनासाठी कारखाने, निर्यातदार एकत्र

पुणे   ः ऊस गाळप हंगाम सुरू होण्यासाठी काही दिवस बाकी असताना साखर निर्यातीच्या नियोजनासाठी कारखान्यांची धावपळ सुरू झाली आहे. राज्यातील सर्व कारखाने आता निर्यातदारांसह एकत्र येऊन नियोजन करीत असल्याचे सूत्रांनी सांगितले.

राष्ट्रीय सहकारी साखर कारखाने महासंघ, महाराष्ट्र राज्य साखर कारखाना संघ, ईस्ट इंडियन शुगर मिल असोसिएशन; तसेच राज्यातील साखर निर्यातदार या बैठकीत सहभागी होणार आहेत. माजी केंद्रीय कृषिमंत्री शरद पवार या बैठकीला उपस्थित राहून वस्तुस्थिती जाणून घेणार आहेत. त्यानंतर निर्यातीबाबत साखर उद्योगाच्या वतीने अंतिम भूमिका श्री. पवार स्पष्ट करतील.

‘‘राज्य सरकारने येत्या १५ ऑक्‍टोबरपासून ऊस गाळप हंगामाला सुरवात करण्याचे यापूर्वीच घोषित केले आहे. मात्र,  बहुसंख्य कारखान्यांकडे असलेला साखरेचा साठा आणि आगामी हंगामातदेखील तयार होणारी भरपूर साखर लक्षात घेता जास्तीत जास्त निर्यात झाल्याशिवाय कारखान्यांना समस्येतून बाहेर पडता येणार नाही, असा निष्कर्ष साखर उद्योगाने काढलेला आहे,’’ अशी माहिती सूत्रांनी दिली.

साखरेचा साठा कमी होत नाही, तोपर्यंत कारखान्यांच्या अडचणी संपणार नाहीत. त्यामुळेच निर्यातवाढीसाठी सर्वांना प्रयत्न करावे लागतील, असा सल्ला श्री. पवार यांनी साखर संघाच्या सभेत सहकारी साखर कारखान्यांना यापूर्वीच दिलेला आहे. त्यामुळे शनिवारी (ता.१३) मुंबईतील यशवंतराव चव्हाण प्रतिष्ठानमध्ये बैठकीचे आयोजन करण्यात आले आहे.