तीन लाख टन कच्च्या साखरेची आयात होणार

नवी दिल्ली : दक्षिण भारतात साखरेचे दर नियंत्रणात राखण्याचे कारण देत केंद्र सरकारने तीन लाख टन कच्ची साखर आयात करण्यास परवानगी दिली आहे. अर्थात, त्यासाठी २५ टक्के आयात शुल्क आकारले जाणार आहे. 

खुला परवाना धोरणांतर्गत ही कच्ची साखर आयात केली जाणार असल्याचे अन्न व नागरी पुरवठा मंत्रालयातर्फे जाहीर करण्यात आले आहे. कच्ची साखर शुद्धिकरणातून शुभ्र साखर तयार करण्याची क्षमता असलेल्या रिफायनरी व कारखान्यांना ही आयात करता येईल.

तुतीकोरीन, काराईकल, चेन्नई, मंगळूर, काकीनाडा, गंगावरम आणि विशाखापट्टण या बंदरांमार्फत कच्ची साखर आयात करता येईल, असेही सरकारने कळविले आहे.

 केंद्र सरकारच्या या निर्णयामुळे देशभरातील साखरेच्या दरावर फारसा परिणाम होणार नसल्याची प्रतिक्रिया राष्ट्रीय सहकारी साखर कारखाना महासंघाचे व्यवस्थापकीय संचालक प्रकाश नाईकनवरे यांनी दिली आहे.