साखर आयात शुल्क १०० टक्के होणार

नवी दिल्ली ः देशांतर्गत बाजार चालू गाळप हंगाम सुरू झाल्यापासून साखरेचे दर पडले आहेत. त्यामुळे पडलेले दर सुधारण्यासाठी सरकार आयात शुल्कात ५० टक्क्यांवरून १०० टक्क्यांपर्यंत वाढ करणार आहे. या संबंधीचा निर्णय सोमवारपर्यंत होऊन शकतो, अशी माहिती सूत्रांनी दिली.  देशातील कारखान्यांना दिलास देण्यासाठी अन्न मंत्रालायाने या आधीच वित्त मंत्रालयाकडे साखर आयात शुल्कात वाढ करण्याची मागणी केली होती. त्यानंतर सरकार आयात शुल्क वाढविणार असल्याचे सूत्रांनी सांगितले. यासंबंधीची सूचना एक ते दोन दिवस किंवा जास्तीत जास्त सोमवारपर्यंत निघू शकते. पाकिस्तानमध्ये यंदाच्या चालू हंगामात विक्रमी उत्पादनाचा अंदाज जाहीर करण्यात आला होता. तसेच मागील हंगामातील साखरेचा साठाही शिल्लक होता. त्यामुळे तेथील सरकारने साखरेला प्रतिकिलो १०.७० पाकिस्तानी रुपये (१ पाकिस्तानी रुपया = ०.६१ भारतीय रुपया) अनुदान देऊऩ १.५ दशलक्ष टन साखर निर्यात करण्याचा निर्णय घेतला होता. तसेच पाकिस्तानमधील सिंध प्रांत सरकारने साखरेला आणखी प्रतिकिलो ९.३० पाकिस्तानी रुपये अनुदान देऊन शिल्लक साखर निर्यात करण्याची घोषणा केली होती. त्यामुळे पाकिस्ताची अनुदानित साखर भारतात येणार असल्याची चर्चा सुरू झाली होती.  देशात आधीच साखरेचे दर पडल्याने साखर उद्योग अडचणीत आला होता. कारखान्यांना तर शेतकऱ्यांना एफआरपी देण्यासाठी कसरत करावी लागणार असल्याचे उद्योगाने सरकारला सांगितले. त्यामुळे कारखानदार आणि व्यापारी संघटनांच्या प्रतिनिधींनी मागील पंधरवाड्यात केंद्र सरकारशी चर्चा करुन साखर आयात शुल्क ५० टक्क्यांवरून ६० टक्के करण्याची मागणी केली होती. तसेच या मागणीला अनुसरून अन्न मंत्रालायानेही वित्त मंत्रालयाकडे पाकिस्तानची साखर रोखण्यासाठी आयात शुल्क किमान ८० टक्क्यांपेक्षा जास्त करण्याची मागणी केली होती. त्यानुसार सरकार आयात शुल्क १०० टक्के करणार असल्याची माहिती सूत्रांनी दिली. कारखान्यांवर विक्रीमर्यादा लावण्याचा विचार देशात यंदा साखरेचा अतिरिक्त पुरवठा व पडलेल्या दरावर नियंत्रण आणण्यासाठी कारखान्यांवर मासिक विक्री मार्यादा लावण्याचा सरकारचा विचार असल्याचे सूत्रांनी सांगितले. साखर कारखान्यांवर मासिक मर्याद लावून सरकार देशातील साखरेचा साठ्याचा अंदाज घेणार आहे. या संबंधीची सूचना सरकार येत्या आठवडाभारात काढणार असल्याची माहिती सरकारी अधीकाऱ्यांनी दिली. चालू गाळप हंगाम सुरू झाल्यापासून साखरेच्या दरात १५ टक्के घट झाली होती. त्यामुळे साखर कारखाने अडचणीत आले होते. हंगाम सुरू झाल्यानंतर इस्माने यंदा विक्रमी उत्पादनाचा अंदाज जाहीर केला होता. त्याचा परिणाम साखरेच्या बाजारावर झाला.