पुणे जिल्ह्यातील १४ कारखान्यांचा गाळप हंगाम आटोपला

पुणे  ः जिल्ह्यातील १४ साखर कारखान्यांचा गाळप हंगाम आटोपला आहे. तोडणी मजुरांनी आपआपल्या गावी जात पावसाळ्यापूर्वी खरीप हंगामाची पूर्वतयारी करण्यास सुरूवात केली आहे. 

जिल्ह्यात एक आॅक्टोबरपासून गाळप हंगामास सुरुवात झाली होती. यंदा सुमारे सहा ते साडे सहा महिने साखर कारखाने सुरू राहिले आहेत. हंगामात १८ साखर कारखान्यांपैकी १७ साखर कारखान्यांनी गळीत हंगाम सुरू केला होता. जिल्ह्यात भीमा पाटस साखर कारखान्याने १२ फेब्रुवारी, तर व्यंकटेशकृपा या खाजगी साखर कारखान्याने २१ फेब्रुवारीला गळीत हंगाम बंद केला होता. त्यानंतर हळूहळू कारखान्यांनी गळीत हंगाम आटोपता घेण्यास सुरुवात केली. जिल्ह्यात एप्रिलअखेरपर्यंत गाळप हंगाम चालण्याची शक्यता आहे.

यंदा गाळप हंगामासाठी जिल्ह्यात एकूण सहकारी ११ व खाजगी ६ साखर कारखाने सुरू झाले होते. या साखर कारखान्यांची दैनंदिन गाळपक्षमता अडीच ते साडेसात हजार टन होती. पाणीटंचाईची वाढती तीव्रता व जनावरांसाठी आवश्यक असलेल्या चाऱ्याची स्थिती बघता मार्चअखेरपर्यंत साखर कारखाने बंद होण्याचा अंदाज होता. परंतु उसाची उपलब्धता अधिक असल्याने गाळप हंगाम उशिराने बंद होत आहे. पुणे जिल्ह्यांतील अनेक भागात पाणीटंचाईची झळ वाढू लागली आहे. त्यामुळे साखर कारखान्यांनी १२ फेब्रुवारीपासून गळीत हंगाम संपवण्यास सुरवात केली. यंदाच्या हंगामात इंदापूर सहकारी साखर कारखान्याने सर्वाधिक ऊसगाळप केल्याचे पुणे प्रादेशिक सहसंचालक कार्यालयाच्या सूत्रांनी सांगितले.