ऊसदरप्रश्नी वांबोरीला काटा बंद अांदोलन

राहुरी, जि. नगर : ऊसदरप्रश्नी स्वाभिमानी शेतकरी संघटनेच्या वतीने वांबोरी येथे शुक्रवारी (ता.२४) प्रसाद शुगर मिलचा काटा बंद करून अांदोलन करण्यात अाले. उसाला ३४०० रुपये भाव जाहीर करावा, या मागणीसाठी आंदोलकांनी एल्गार केला.

संघटनेचे तालुकाध्यक्ष रवी मोरे यांचे नेतृत्वाखाली हे अांदोलन करण्यात अाले. सकाळपासून आंदोलक कारखान्याजवळ ठिय्या देऊन होते. त्यामुळे वजन काटा बंद राहिला. दरम्यान, शनिवारपर्यंत एका दिवसाची मुदत द्यावी, भाव जाहीर करू, अशी भूमिका प्रसाद शुगरचे अध्यक्ष प्राजक्त तनपुरे यांनी घेतली व आंदोलकांना आंदोलन मागे घेण्याची विनंती केली. परंतु आंदोलक त्यांच्या भूमिकेवर ठाम राहिले. परिणामी काटा बंदच राहिला.

संघटनेचे कार्यकर्ते राहुरी बाजार समितीत एकत्र आले व त्यांनी त्यांचा मोर्चा प्रसाद शुगर मिलकडे वळविला. तेथे चोख पोलिस बंदोबस्त होता. राज्य राखीव दलाचे पथकही हजर होते. प्रवेशद्वाराजवळ आंदोलकांना अडविले गेले. परंतु, आंदोलकांनी दार तोडून आत प्रवेश केला. त्यांनी त्यांचा मोर्चा वजन काट्याकडे नेला.

तेथे आंदोलक बसून राहिले. आंदोलकांसमोर रवी मोरे, प्रकाश देठे, सुनील इंगळे, दिनेश वराळे यांची या वेळी भाषणे झाली. आंदोलन सुरू झाल्यावर अध्यक्ष प्राजक्त तनपुरे तेथे आले. आपण आज संचालकांची बैठक घेऊन शनिवारी भाव जाहीर करू, असे त्यांनी सांगितले. पण आंदोलक त्यांचे ऐकण्याच्या मनस्थितीत नव्हते. आजच भाव जाहीर करावा असा आंदोलकांचा आग्रह होता. ३४०० रुपये दर जाहीर केला तर लगेचच आंदोलन मागे घेऊ, असे रवी मोरे म्हणाले. 

सध्या साखरेचे दर कमी होत आहेत. त्याची काहीही शाश्वती नाही. सरकारच्या चुकीच्या धोरणामुळे साखरेचे भाव पडत आहेत. हे आंदोलन आमदार, खासदार यांचे घरासमोर केले पाहिजे, असा इशारा या वेळी देण्यात अाला. या वेळी जोरदार घोषणाबाजी झाली. बराच वेळ आंदोलन सुरू होते.

या आंदोलनात संदीप शिरसाठ, विजय तोडमल, प्रमोद पवार, राहुल करपे, सुभाष वने, सुरेश बोरावके, सतीष दाबाडे, विशाल तारडे, सतीष पवार, अच्युत बोरकर, पोपट तारडे, भागवत तारडे, अरुण डोंगरे, प्रदीप पवार, राहुल पवार आदी कार्यकर्ते सहभागी झाले होते.