आटपाडीत थकीत ऊसबिलप्रकरणी शेतकऱ्यांचा मोर्चा

आटपाडी, जि. सांगली ः माणगंगा साखर कारखान्याची थकीत उसबिले तातडीने द्यावीत, यासाठी शनिवारी (ता. १०) शेतकऱ्यांनी तहसील कार्यालयावर मोर्चा काढला. स्वाभिमानी शेतकरी संघटना आणि किसान सभेने मोर्चाचे आयोजन केले होते. शेतकऱ्यांना ऊसबिले लवकरच दिली जातील, असे आश्‍वासन कारखान्याच्या अधिकाऱ्यांनी दिले. माणगंगा साखर कारखान्याची उसाची बिले गेल्या वर्षीसह थकली आहेत. त्यासाठी आनेक दिवसांपासून शेतकरी विविध भागांतून कारखान्यावर हेलपाटे मारत होते. गेल्या दहा दिवसांपूर्वी स्वाभिमानी शेतकरी संघटनेच्या कार्यकर्त्यांनी कारखान्यावर दगडफेक करून तोडफोड केली होती. त्याननंतर आंदोलकावर कारखान्याने गुन्हे दाखल केले होते. स्वभिमानी शेतकरी संघटना आणि किसान सभेने मोर्चाचे आयोजन केले होते. या मोर्चाकडे तालुक्‍याचे लक्ष लागले होते. मोर्चाचे नेतृत्व शेतकरी संघटनेचे महेश खराडे आणि किसान सभेचे अरुण माने यांनी केले होते. बस स्थानकापासून मोर्चाची सुरवात झाली. मुख्य पेठेतून बाजार पटांगणमार्गे तहसील कार्यालयावर घोषणा देत मोर्चा गेला. तेथे कारखान्याचे अध्यक्ष राजेंद्रअण्णा देशमुख, उपाध्यक्ष भगवान मोरे, प्रभारी कार्यकारी अधिकारी नामदेव मोटे, पंचायत समितीचे सभापती हर्षवर्धन देशमुख यांच्यासोबत आंदोलकांची सकारात्मक चर्चा झाली. या वेळी कारखान्याचे अध्यक्ष श्री. देशमुख यांनी मोर्चात सहभागी झालेल्या सत्तर शेतकऱ्यांची ऊसबिले २० फेबुवारीपर्यंत तसेच उर्वरित शेतकऱ्यांची ५ मार्चला बिले देण्याचे आश्‍वासन दिले. या वेळी स्वाभिमानी शेतकरी संघटनेचे जिल्हाध्यक्ष विकास देशमुख, सातारा जिल्हाध्यक्ष सचिन नलवडे, ॲड. सचिन सातपुते, सुदर्शन वाडकर, संजय डेढे, राहुल बिडवे, अनिल बिराजदार आदी सहभागी झाले होते.