शेतकऱ्यांनी बियाणाचे मळे करावे ः सुरेश माने-पाटील

सांगली ः उसाचे विक्रमी उत्पादन घेण्यासाठी शेतकऱ्यांनी स्वतः बियाणाचे मळे तयार केले पाहिजे. ऊस ९ ते १० महिन्यांचा असावा. बियाणांसाठी जाड ऊस, लांब कांड्या साखर कमी असलेला ऊस आपल्या शेतातून निवडला पाहिजे. सरीतील अंतर वाढवा आणि उसाचे उत्पादन वाढवा हे तंत्र शेतकऱ्यांनी आत्मसात केले पाहिजे, असे मत माजी शास्त्रज्ञ वसंतदादा शुगर इन्स्टिट्यूटचे सुरेश माने-पाटील यांनी व्यक्त केले. सांगली येथे सुरू असलेल्या ‘ॲग्रोवन’ प्रदर्शनात ऊस पिकाचे भरघोस उत्पादन व व्यवस्थापन या विषयावर शनिवारी (ता. ६) ते बोलत होते. या वेळी सांगलीसह सातारा, कोल्हापूर जिल्ह्यातील शेतकरी मोठ्या संख्येने उपस्थित होते.  सुरेश माने-पाटील म्हणाले, की देशातील ऊस एकरी उत्पादकता २७ टन आहे. उत्पादकता वाढविली पाहिजे. यासाठी ऊस पिकाचा शास्त्रोक्त पद्धतीने अभ्यास करावा. सांगली जिल्ह्यातील क्रांती कारखाना, हुतात्मा कारखाना, राजारामबापू कारखान्यांची उत्पादकता ही ४० ते ४३ टनापर्यंत आहे. सांगली जिल्ह्यात अनेक शेतकरी उसाचे विक्रमी उत्पादन घेतात. ही चांगली बाब आहे. अशा शेतकऱ्यांना भेटी देऊन त्यांच्या यशाचे गमक माहिती करून घेतली पाहिजे.  आपल्याकडे आडसाली, पूर्व हंगाम, सुरू हंगाम हे उसाच्या लागवडी हंगाम आहेत. आडसाली हंगाम म्हणजे अधिक उत्पादन देणारा हंगाम आहे. या हंगामात आंतर पीक घेऊ नये. यामुळे उत्पादनात घट होते. पूर्व हंगामामध्ये आंतरपिक घेतले चालते. म्हणजे हा हंगाम ऊस आणि आंतरपिक म्हणून ओळखला जातो. यामध्ये आंतरपिकांतून अधिक फायदा होतो. सुरू हंगामात उसाचे ४० ते ६० टन उत्पादन मिळते. हा हंगाम १३ ते १४ महिन्यांत गाळपाला जातो. त्यामुळे अधिक उत्पादन घेण्यासाठी आडसाली लागवड केली पाहिजे.   व्याख्यानातील ठळक मुद्दे