शेतकऱ्यांच्या प्रश्नांवर सर्जिकल स्ट्राइक करणार : सिन्हा

अकोला : या देशातील शेतकऱ्यांनी पिकवलेल्या शेतमालाला हमीभाव मिळावा, संपूर्ण शेतमाल खरेदी केला जावा, अशा साध्या मागण्या हे सरकार मंजूर करीत नाही, त्यामुळे जोपर्यंत शासन शेतकऱ्यांच्या मागण्यांबाबत ठोस आश्वासन देत नाही, तोवर अकोला सोडणार नाही. देशाच्या सैनिकांनी जसे सर्जिकल स्ट्राइक केले, तसेच आंदोलन सोमवारी (ता. 4) शेतकऱ्यांना सोबत घेऊन मी छेडणार आहे, असा इशारा देशाचे माजी अर्थमंत्री यशवंत सिन्हा यांनी दिला. येथील स्वराज्य भवनाच्या मैदानावर झालेल्या कापूस-सोयाबीन-धान परिषदेत ते बोलत होते.

यशवंत सिन्हा म्हणाले, गेल्या महिन्यात अकोल्यात आलो त्यावेळी नाफेडने कुठलीही अट न लावता शेतमाल खरेदी करावा, अशी मागणी केली. परंतु 48 दिवस लोटले तरी याबाबत सरकारने काहीही केले नाही. आधीच नोटाबंदीमुळे संपूर्ण ग्रामीण व्यवस्थेला हादरे बसले आहेत. शेतकऱ्यांचे अतोनात नुकसान झाले. शेतकऱ्यांसाठी इन्कम सिक्‍युरिटी स्कीम असणे गरजेचे आहे. परंतु सध्या देशात शेतकऱ्यांचे साधे साधे प्रश्नही सुटत नाहीत. नोटाबंदीनंतर झालेल्या फायद्यांबाबत दिली जाणारी उदाहरणे हास्यास्पद बनल्याचे सांगत शेतकरी वर्षानुवर्षे संकटात आहेत, हे खरे असले तरी सध्याच्या काळात तो ठगविलो असल्याचा अनुभव घेत आहे, असे सांगत सिन्हा यांनी भाजप सरकारवर थेट टीका केली. हे सरकार येऊन साडेतीन वर्षे झाले, परंतु काहीच शेतकऱ्यांच्या पदरात पडले नाही. दुसरीकडे देशाच्या संसदेच्या अधिवेशनापेक्षा काही राज्यांच्या निवडणुका मोठ्या झाल्याचेही सिन्हा म्हणाले.

शेतकऱ्यांच्या प्रश्नांवर ठोस काही तरी हवे आहे. जोपर्यंत शेतकऱ्यांच्या प्रश्नांबाबत ठोस काही सरकार देत नाही तोवर आपला लढा सुरू राहील. अकोल्यात सोमवारी शेतकऱ्यांना सोबत घेऊन सर्जिकल स्ट्राइक करणार आहे, असे सिन्हा म्हणाले. जोपर्यंत मागण्या मान्य करणार नाही तोवर अकोला सोडणार नाही. आपण दिल्लीला जाण्याचे परतीचे तिकीट अद्यापही काढले नाही, असे सिन्हा यांनी सांगितले.

आजच्या आंदोलनाकडे लक्ष यशवंत सिन्हा यांच्या नेतृत्वात शेतकरी नेते सोमवारी सकाळी 10 वाजता जिल्हाधिकारी कार्यालयावर मोर्चा काढणार आहेत. या मोर्चात शेतकऱ्यांनी संपूर्ण कुटुंबासह सहभागी व्हावे, असे आवाहन रविकांत तुपकर यांनी केले. आंदोलनाची पुढील दिशा वेळेवर जाहीर केली जाईल, असे सांगत त्यांनी सोमवारच्या आंदोलनाबाबत गुपीत कायम ठेवले.