पीककर्ज वाटप सुरू करण्याची स्वाभिमानीची मागणी

परभणी : उत्पादनात घट आल्यामुळे तसेच शेतीमालास कमी भाव मिळत असल्यामुळे आर्थिक अडचणीमध्ये असलेल्या जिल्ह्यातील शेतकऱ्यांना तत्काळ खरीप पीक कर्ज वाटप सुरू करावे, अशी मागणी स्वाभिमानी शेतकरी संघटनेतर्फे जिल्हा अग्रणी बॅंकेच्या व्यवस्थापकांकडे करण्यात आली आहे. खरीप हंगाम तोंडावर आलेला असताना जिल्ह्यातील बॅंकांनी अद्याप पीक कर्ज वाटप सुरू केलेले नाही. पीक कर्ज मागणीसाठी बॅंकेत गेलेल्या शेतकऱ्यांना उडवाउडवीची उत्तरे दिली जात आहेत. जूननंतर कर्ज वाटप केले जाईल, असे सांगितले जात आहे. अनेक बॅंकांनी कर्ज माफ झालेल्या शेतकऱ्यांची यादी अद्याप बॅंकेत लावलेली नाही. कर्ज माफ झालेल्या शेतकऱ्यांच्या याद्या फलकावर लावाव्यात. नव्याने मागणी करणाऱ्या शेतकऱ्यांना तत्काळ पीक कर्ज देण्यात यावे. सद्यस्थितीत कर्ज दिल्यास खरीप पेरणीसाठी बी, बियाणे, खते खरेदीसाठी शेतकऱ्यांना उपयोग होईल, अन्यथा सावकाराकडे जाण्याची वेळ येईल. त्यामुळे बॅंकांना कर्ज वाटप सुरू करण्याचे आदेश देण्यात यावेत, अशी मागणी स्वाभिमानी शेतकरी संघटनेच्या महिला आघाडीच्या प्रदेशाध्यक्ष रसिका ढगे, किशोर ढगे, राजाभाऊ आवरगंड, केशव आरमळ, भास्कर खटिंग, डिगांबर पवार, अमोल जवंजाळ,रा जू शिंदे, रामकिशन गरुड, संतोष पोले, गजनान गरुड यांनी जिल्हा अग्रणी बॅंकेच्या व्यवस्थापकांकडे केली आहे.