पीककर्जाचे वाटप न करणाऱ्या बॅंकेवर कारवाई करा : खोत

सांगली ः खरीप हंगामासाठी राष्ट्रीयीकृत बॅंकेकडून पीककर्जाचे वाटप न करणाऱ्या बॅंकेवर कडक कारवाई करण्याच्या सूचना कृषी राज्यमंत्री सदाभाऊ खोत यांनी जिल्हाधिकारी विजयकुमार काळम-पाटील यांना शुक्रवारी (ता. १५) दिल्या. सांगली येथील जिल्हाधिकारी कार्यालयात आयोजित केलेल्या खरीप हंगाम बैठकीत मंत्री खोत बोलत होते. या वेळी जिल्हाधिकारी विजयकुमार काळम, आमदार विलासराव जगताप, जिल्हा कृषी अधीक्षक अधिकारी राजेंद्र साबळे, कृषी उपसंचालक मकरंद कुलकर्णी, यांच्यासह कृषी विभागातील अधिकारी उपस्थित होते.

सध्या खरीप हंगामात शेतकऱ्यांना २१०० कोटी रुपये कर्जपुरवठा करण्याचे उद्दिष्ट आहे. जिल्हा बॅंकेकडून ५० टक्के कर्जाचे वाटप झाले आहे. मात्र, बॅंक ऑफ इंडिया, बॅंक ऑफ महाराष्ट्र, सेंट्रल बॅंक, आयडीबीआय आणि आयसीसीआय या बॅंकेडून कर्जपुरवठा होत नसल्याचे अधिकाऱ्यांनी सांगितले.

राज्यमंत्री सदाभाऊ खोत म्हणाले, की खरीप हंगामासाठी कर्ज उपलब्ध करून देण्यासाठी तातडीने पाठपुरावा करा. त्यासाठी प्रत्येक तालुकानिहाय राष्ट्रीयीकृत बॅंकेच्या अधिकाऱ्यांनी कर्जपुरवठा करण्यासाठी नियोजन करा. कर्जवापट करताना प्रत्येक तालुक्‍यात आठवड्यातून दोन दिवस वेगळे काउंटर सुरू करा. कर्जासाठी आल्यानंतर त्याच ठिकाणी तातडीने कर्जपुरवठा करणे सोपे जाईल. गेल्या वर्षी खरीप हंगामात कर्जपुरवठा कमी झाला होता. यंदाच्या हंगामात कर्जपुरवठा करण्यासाठी कृषी विभागानेदेखील पुढाकार घेणे आवश्‍यक आहे.

खरीप कर्जपुरवठ्याबाबत जिल्हाधिकारी म्हणाले, की जिल्ह्यातील सर्वच बॅंकांची एक बैठक घेतली आहे. त्या बैठकीत शेतकऱ्यांना कर्जपुरवठा करण्याचे आदेश दिले आहेत. दुसरी बैठक मंगळवारी (ता. १९) आणि तिसरी बैठक सोमवारी (ता. २५) घेतली जाणार आहे. त्यामध्ये बॅंकेने किती टक्के शेतकऱ्यांना कर्ज दिले आहे, याचा आढाव घेतला जाणार आहे. ज्या बॅंकेनी कर्जपुरवठा केला नाही, अशा बॅंकेची तक्रार आरबीआयकडे केली जाणार आहे, शासनाने पेरणी हंगाम संवाद सुरू केला आहे. त्यानुसार प्रत्येक तालुक्‍यात पेरणी करण्यासाठी मी येणार आहे. त्यामुळे प्रत्येक गावाची यादी माझ्याकडे द्या, असे मंत्री सदाभाऊ खोत यांनी कृषी विभागाला सूचना दिल्या.

बैठकीतील महत्त्वाचे मुद् दे जिल्ह्यातील कृषी विभागातील रिक्त पदे लवकरच भरू ग्रामपंचायत कार्यालयात कृषी सहायक आणि मंडल अधिकारी यांच्या नावाचे भेटीचे वार असलेले फलक लावा द्राक्षाला बारमाही विम्याचा प्रस्ताव द्या

कर्जवाटपाची बॅंकनिहाय अाकडेवारी जिल्हा मध्यवर्ती बॅंक ः ५० टक्के बॅंक ऑफ इंडिया ः २१ टक्के * बॅंक ऑफ महाराष्ट्र ः १८ टक्के सेंट्रल बॅंक ः ५ टक्के आयडीबीआय ः ३२ टक्के आयसीसीआय  ः ११ टक्के