भुईमुगाचे नुकसान टाळण्यासाठी घ्या काळजी

संग्रहित छायाचित्र
संग्रहित छायाचित्र

अकोला : उन्हाळी पीक म्हणून वऱ्हाडात बऱ्यापैकी लागवड क्षेत्र असलेल्या भुईमुगाचे गेल्या हंगामात मोठ्या प्रमाणात नुकसान झाले. भुईमुगाची अतोनात वाढ, शेंगा न लागणे, लागलेल्या शेंगा वजनाने हलक्या राहणे, अशा असंख्य तक्रारी तीनही जिल्ह्यांतून मोठ्या प्रमाणात अाल्या होत्या. या हंगामात भुईमुगाची लागवड करताना शेतकऱ्यांनी योग्य ती काळजी घेतल्यास नुकसान टळू शकते, असे तज्ज्ञांनी ‘ॲग्रोवन’ला सांगितले.

अकोला जिल्ह्यात पातूर, अकोट, तेल्हारा, बुलडाणा जिल्ह्यांत मेहकर, खामगाव, संग्रामपूर, जळगाव जामोद तसेच वाशीम जिल्ह्यात काही भागांत भुईमुगाची लागवड केली जाते. जानेवारीत भुईमूग लागवडीला सुरवात होते.

सध्या या पिकाच्या लागवडीसाठी शेतकऱ्यांची तयारी सुरू झाली अाहे. या वर्षी पाऊस कमी झाल्याने भूजलपातळी घटली, तसेच प्रकल्पही कोरडे आहेत. यामुळे क्षेत्रघटीची अाधीच शक्यता अाहे. मात्र ज्या शेतकऱ्यांकडे पाण्याची शाश्वत उपलब्धता अाहे, असे शेतकरी लागवडीच्या तयारीला लागले अाहेत. गेल्या हंगामात मोठ्या प्रमाणात नुकसान झाल्याने शेतकरी थोडे सावध झाले अाहेत.

लागवडीस विलंब नको उन्हाळी भुईमुगाची जानेवारीत लागवड सुरू होते. काही शेतकरी फेब्रुवारीतही लागवड करतात. मात्र उशिरा लागवड केल्यास  पाण्याचा फटका बसतो. शिवाय पिकाचा कालावधी लांबतो. त्यामुळे शेतकऱ्यांनी जानेवारीअखेरपर्यंतच किंवा जास्तीत जास्त फेब्रुवारीच्या पहिल्या अाठवड्यानंतर पेरणी करू नये. पेरणी करताना गादीवाफा व रुंद वरंबा सरी किंवा सपाट वाफ्यावर पेरणी करणे सोयीचे राहील. पाणी व खत व्यवस्थापन वेळेत करायला हवे. शेंगा भरण्याच्या अवस्थेत कॅल्शिअम या अन्नघटकाच्या पूर्ततेसाठी पिकाला जीप्सम द्यावे. एप्रिल-मेमध्ये पाण्याचा खंड पडू देऊ नये. असे न झाल्यास शेंगा लागणे, पोचट शेंगांचे प्रमाण वाढणे, अशा समस्या निर्माण होऊ शकतात. गेल्या हंगामात यामुळेच शेकडो हेक्टरवरील भुईमुगाचे नुकसान झाले होते.

भुईमुगाचे अधिक उत्पादन घेण्यासाठी पिकाला योग्य पाणी, शिफारशीत खतमात्रा, जिप्समचा वापर, तसेच लागवडीपूर्वी बियाण्यास प्रक्रिया करूनच लागवड करावी. लागवड शक्यतोवर जानेवारीत होईल यादृष्टीने नियोजन करावे. - डॉ. एम.वाय. लाडोळे, सहायक प्राध्यापक तेलबिया संशोधन विभाग, ‘पंदेकृवि’ अकोला.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com