पीक कर्जाच्या अर्जावर तातडीने निर्णय घ्या : जळगाव जिल्हाधिकारी

जळगाव : जिल्ह्यात पीककर्ज व कर्ज वितरण यासंबंधी जिल्हा प्रशासनाने नुकतीच बैठक घेतली. त्यात कर्ज मागणीसाठी जे प्रस्ताव आले असतील त्यावर तातडीने निर्णय घ्यावा, विलंब केला तर संबंधित अधिकाऱ्यावर कारवाई केली जाईल, असा इशारा जिल्हाधिकारी किशोर राजेनिंबाळकर यांनी दिला.  जिल्ह्यातील पीककर्ज वितरणाचा लक्ष्यांक, आत्तापर्यंत झालेले वितरण, शेतकऱ्यांचे अर्ज व बॅंकांकडे उपलब्ध निधी याची माहिती घेण्यात आली. बैठकीत अग्रणी बॅंकेचे व्यवस्थापक पी. पी. गिलाणकर, जिल्हा उपनिबंधक विशाल जाधवर, जिल्हा अधीक्षक कृषी अधिकारी विवेक सोनवणे, जिल्हा उद्योग केंद्राचे महाव्यवस्थापक साहेबराव पाटील आदी उपस्थित होते.  ज्यांना कर्जमाफीचा लाभ मिळाला त्या शेतकऱ्यांनाही बॅंकांनी पीककर्ज वितरण करावे. एकही शेतकरी वंचित राहायला नको. जे अर्ज पीककर्ज मागणीसाठी बॅंकेकडे आले आहेत, ते तातडीने मंजूर करावेत. सर्व बॅंकांनी पीककर्ज वितरण लक्ष्यांक वेळेत पूर्ण करायला हवा. १५ दिवसांत पीककर्जासाठी आलेला अर्ज मार्गी लावला नाही, तर संबंधित अधिकाऱ्यावर जबाबदारी निश्‍चित केली जाईल. कर्ज प्रकरण योग्य असले तर ते तातडीने मंजूर करून वित्तपुरवठा लागलीच व्हायला हवा. कर्ज प्रकरण नामंजूर केले तर संबंधित शेतकऱ्याला १५ दिवसांमध्ये ते कळविले जावे. नियम लक्षात घेऊनच कर्ज वितरण करावे. जिल्हा बॅंक व राष्ट्रीयीकृत बॅंकांकडे किती अर्ज आले आहेत, याची माहिती घेण्यात आली. तसेच मुद्रा योजनेबाबतही अधिकाऱ्यांना सूचना देण्यात आल्या. जे कर्जदार शेतकरी आहेत, त्यांना पंतप्रधान पीक विमा योजनेत सहभागी करून घेतले जावे. तसेच बिगर कर्जदारांनाही यासंदर्भात माहिती देऊन या योजनेचा लाभ त्यांना द्यावा, असे आवाहन जिल्हाधिकारी राजेनिंबाळकर यांनी केले.