दुष्काळनिधीची कार्यवाही तत्काळ करा : पालकमंत्री पाटील

जळगाव : पालकमंत्री चंद्रकांत पाटील यांनी शनिवारी (ता.१८) जिल्ह्यात शेतकऱ्यांशी संवाद साधून टंचाईस्थितीची माहिती घेतली. पाटील यांनी लोकसभा निवडणुकीच्या प्रचारानंतर जिल्ह्यात प्रथमच हजेरी लावली. दुष्काळनिधी व इतर उपाययोजनांबाबत तत्काळ कार्यवाहीचे आदेश त्यांनी प्रशासनाला दिले. चाळीसगाव, पारोळा, अमळनेर तालुक्‍यात शेतकऱ्यांकडे जाऊन त्यांनी दुष्काळी स्थितीची माहिती घेतली. 

जिल्ह्यातील दुष्काळ गंभीर आहे. तक्रारी करूनही समस्या सुटत नसल्याचा सामाजिक कार्यकर्ते, सरपंचांचा आरोप आहे. पाटील हे फक्त नावालाच पालकमंत्री असल्याची टीका अनेक लोकप्रतिनिधींनी केली. अखेर जिल्ह्यात दाखल झालेल्या पालकमंत्र्यांनी शेतकऱ्यांच्या समस्यांचा धावता आढावा घेतला.

सकाळी सात वाजता पाटील चाळीसगावात दाखल झाले. शासकीय विश्रामगृहात दुष्काळीस्थितीसंबंधी प्रशासन व इतर तज्ज्ञांकडून त्यांनी प्राथमिक माहिती घेतली. त्यानंतर त्यांनी हिरापूर, वाघळी (ता. चाळीसगाव), तरवाडे खुर्द, मोहाडी (ता. पारोळा) येथे टंचाई परिस्थितीचा आढावा घेतला. अमळनेर तालुक्‍यातील मंगरूळ, अनोरे (ता. अमळनेर) येथे त्यांनी शेतकऱ्यांशी चर्चा केली. आर्डी येथील गाळमुक्त धरण कामाची पाहणी पालकमंत्र्यांनी केली. तसेच ढेकूसिम (ता. अमळनेर) येथील टंचाई परिस्थितीचा आढावा घेतला. 

पाटील यांनी हिरापूर, वाघळी येथे थेट शेतात जाऊन पाहणीदेखील केली. शेतकऱ्यांच्या अडचणी जाणून घेतल्या. शेतकऱ्यांनी दुष्काळनिधी व टंचाईच्या तक्रारी केल्या. पाटील यांनी यासंदर्भात सविस्तर माहिती अधिकाऱ्यांकडून घेतली आणि तत्काळ कार्यवाही करा, टंचाई दूर करण्यासाठी टॅंकरचे प्रस्ताव तातडीने मार्गी लावा, जलयुक्त शिवार अभियानातील कामे शक्‍य तेवढ्या लवकर पूर्ण करण्याच्या सूचना प्रशासनाला दिल्याची माहिती सूत्रांनी दिली.