खानदेशात टॅंकरचा आकडा शंभरी पार

जळगाव  : खानदेशात पाणीटंचाई तीव्र होत आ हे. टॅंकरची संख्या शंभरीपार पोचली आहे. ही संख्या आणखी १० ते १२ ने वाढू शकते. टंचाईसाठी उपाययोजना केल्या जात आहेत. मात्र, भूगर्भात पाणीच नसल्याने प्रशासनासमोरही अडचणी आहेत. सर्वाधिक गंभीर समस्या नंदुरबार, शिंदखेडा (जि. धुळे) या तालुक्‍यांमध्ये आहे. 

नंदुरबार तालुक्‍यात सुमारे ४० गावांमध्ये टंचाईस्थिती बिकट आहे. शहादा, नवापुरातही काही गावांमध्ये जलसंकट आहे. जिल्ह्यात सुमारे ४० टॅंकर सुरू आहेत. धुळे जिल्ह्यात शिंदखेडा, साक्री व धुळे तालुक्‍यांत संकट वाढत आहे. पांझरा व इतर नदीकाठच्या गावांमध्येही टंचाई वाढली आहे. तापी नदीकाठी स्थिती बरी आहे. जिल्ह्यात सुमारे ३५ टॅंकर सुरू आहेत. 

जळगाव जिल्ह्यात सुमारे ४५ टॅंकर सुरू आहेत. पाण्याचे स्राेत तात्पुुरते उपाय करूनही मिळत नसल्याने पाणीटॅंकरनेच पाठविण्याची वेळ आली आहे. टॅंकरचे पाणी ग्रामस्थ धुणी-भांड्यासाठी वापरतात. पण, पिण्याच्या पाण्यासाठी नजीकच्या खासगी जलशुद्धीकरण यंत्रणेवर अवलंबून राहावे लागत आहे. रोज २० ते ३० रुपयांचे पिण्याचे पाणी काही गावांमध्ये एका घरातील सदस्यांना घ्यावे लागत आहे. कासोदा (ता. एरंडोल, जि. जळगाव), नशिराबाद (जि. जळगाव), आसोदा (जि. जळगाव), कजगाव (ता. भडगाव, जि. जळगाव) आदी मोठ्या ग्रामपंचायतींच्या क्षेत्रातील ग्रामस्थांना टॅंकरसाठी पैसे मोजावे लागत आहेत. 

गिरणाकाठच्या अनेक गावांमध्ये ग्रामपंचायती दोन दिवसाआड पाणीपुरवठा करीत आहेत. गिरणा नदीत टंचाई निवारणार्थ पाणी सोडले आहे. परंतु, ते सोमवारपर्यंत (ता. २५) नदीच्या शेवटच्या भागात पोचले नव्हते. या आवर्तनामुळे गिरणाकाठच्या ४० ते ५० गावांमध्ये महिनाभर पाण्याची समस्या कमी राहील, अशी स्थिती आहे. 

मिरची पिकाला फटका नंदुरबार तालुक्‍यातील कोळदे, लहान शहादे, पळाशी, धमडाई, पथराई, नाशिंदे, खोंडामळी, तिसी, चौपाळे, कोठली आदी ३१ गावांमध्ये मिरची पिकालाही पाणीटंचाईचा फटका बसला आहे.