जळगाव : निवडणुकीमुळे टॅँकरचे प्रस्ताव खोळंबले

निवडणुकीमुळे टॅँकरचे प्रस्ताव खोळंबले
निवडणुकीमुळे टॅँकरचे प्रस्ताव खोळंबले

जळगाव : खानदेशात दिवसागणिक पिण्याच्या पाण्याची समस्या गंभीर होत आहे. टॅंकर मागणीचे प्रस्ताव प्रशासनाकडे वाढत आहेत. टॅंकरची संख्या जळगाव जिल्ह्यात १३२ वर पोचली आहे. धुळे व नंदुरबारात मिळून ११० पेक्षा अधिक टॅंकर सुरू आहेत. टॅंकर मागणीचे अनेक प्रस्ताव निवडणुकीमुळे मंजुरीअभावी पडून आहेत. आचारसंहितेचा फटका पाणीटंचाईच्या उपाययोजनांना बसत असल्याचे सरपंच, ग्रामस्थांचे म्हणणे आहे.  

जळगाव जिल्ह्यात टंचाई वाढल्याने टॅंकरसाठी अनेक प्रस्ताव दाखल झाले. त्याच्या मंजुरीसाठी ग्रामसेवक, तलाठ्यांचे सहकार्य मिळत नाही. कारण ही मंडळी निवडणुकीच्या कामात विविध भागात व्यस्त आहे. यातच मागील पंधरवड्यात जळगावात ४७ टॅंकर वाढले आहेत. चाळीसगाव तालुक्‍यात २९ व अमळनेरात २३ टॅंकर सुरू आहेत. जळगाव जिल्ह्यातील धरणगाव, यावल, एरंडोल, रावेर, चोपडामध्ये, तर नंदुरबारमधील तळोदामध्ये टॅंकर सुरू नसल्याची माहिती मिळाली. 

नंदुरबार तालुक्‍यात ४१ पेक्षा अधिक टॅंकर सुरू आहेत. धुळ्यात साक्री, धुळे व शिंदखेड्यात मिळून ६० पेक्षा अधिक टॅंकर सुरू आहेत. तात्पुरत्या पाणी योजनांबाबतही प्रशासनाला यश येत नसल्याची स्थिती आहे. पाणीटंचाई दूर करण्यासाठी खानदेशात अनेक गावांमध्ये विहिरींचे अधिग्रहण केले आहे. आवश्‍यकतेनुसार तात्पुरत्या पाणी योजनांबाबत कार्यवाही सुरू आहे. परंतु, टॅंकरची मागणी मात्र कायम असून, त्याच्या प्रस्तावांचे ढीग तहसील व इतर कार्यालयांमध्ये वाढत आहेत. 

जळगावात १४७ गावांत तीव्र टंचाई

जळगाव जिल्ह्यात १४७ गावांना टंचाईच्या तीव्र झळा बसत आहेत. नंदुरबार व धुळे जिल्ह्यांतील मिळून १५० गावांमध्ये टंचाई स्थिती गंभीर आहे. संबंधित गावांमध्ये विहीर खोलीकरण, नव्या कूपनलिका तयार करूनही पुरेसे पाणी उपलब्ध होत नसल्याने टॅंकर सुरू करावे लागले आहेत. जळगाव जिल्ह्यात २४२ गावांसाठी २४७ विहिरी अधिग्रहीत केल्या आहेत. ४६ गावांना ४३ ठिकाणी तात्पुरत्या पाणीपुरवठा योजना सुरू आहेत. ५४ गावांना ९९ विहिरी मंजूर आहेत. ३८ गावांना ५२ नवीन कूपनलिका सुरू केल्या आहेत. ४५ गावांमध्ये विहीर खोलीकरणाची कामे सुरू आहेत, असा दावा काही दिवसांपूर्वी प्रशासनाने केला होता.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com