शेतकरी आत्महत्या मदतप्रकरणी तहसीलदार निलंबित

हिंगोली : शेतकरी आत्महत्याग्रस्त कुटुंबाच्या अर्जाचे गांभीर्य विचारात घेऊन तत्काळ कार्यवाही करणे अपेक्षित असताना तहसीलदारांनी १० दिवस विलंबाने कार्यवाही केली. याप्रकरणी विभागीय आयुक्तांनी हिंगोलीचे तहसीलदार गजानन शिंदे यांच्यावर निलंबनाची कारवाई केली.  हिंगोली तालुक्यातील शेतकरी वामन जाधव यांनी २०१५ मध्ये आत्महत्या केली होती. जाधव यांच्या वारसास शासनाकडून ३१ हजार रुपये रोख आणि ६९ हजार रुपये मुदत ठेवीच्या स्वरूपात याप्रमाणे आर्थिक मदत करण्यात आली. जाधव यांचा मुलगा संजय जाधव यांनी त्यांच्या आईच्या वैद्यकीय उपचारांसाठी मुदत ठेवीमधून रक्कम देण्याची मागणी अर्जाद्वारे ३१ आॅक्टोबर २०१७ रोजी तहसीलदार गजानन शिंदे यांच्याकडे केली होती. या अर्जावर दहा दिवस काहीही कार्यवाही केली नाही. आईच्या उपचारासाठी रक्कम मिळत नसल्यामुळे ९ नोव्हेंबर २०१७ रोजी संजय जाधव यांनी विष प्राशन करून आत्महत्या करण्याचा प्रयत्न केला. उपचारादरम्यान संजय जाधव यांचा १० नोव्हेंबररोजी मृत्यू झाला. तहसीलदार शिंदे यानी ९ नोव्हेंबर रोजी अर्जातील त्रुटीच्या अनुषंगाने पूर्तता करण्याचे पत्र अर्जदारास निर्गमित केल्याचे प्राथमिक चौकशीत स्पष्ट झाले आहे. यामुळे शेतकरी आत्महत्याग्रस्त कुटुंबाच्या अर्जाचा गांभीर्याने विचारात घेऊन तत्काळ कार्यवाही करणे अपेक्षित असताना १० दिवस विलंबाने कार्यवाही केल्याप्रकरणी विभागीय आयुक्त यांनी शुक्रवारी (ता.२३)  तहसीलदार गजानन शिंदे यांच्या निलंबनाचे आदेश काढले.