पंढरपुरातील ‘विजय शुगर्स’च्या लिलावास तात्पुरती स्थगिती

सोलापूर : करकंब (ता. पंढरपूर) येथील विजय शुगर कारखान्याच्या लिलावास मुंबई उच्च न्यायालयाने तात्पुरती स्थगिती दिली. जिल्हा मध्यवर्ती सहकारी बॅंकेने लिलावास स्थगिती मिळावी, यासाठी न्यायालयात अर्ज दाखल केला होता. मुंबई उच्च न्यायालयात झालेल्या सुनावणीदरम्यान लिलावास तात्पुरती स्थगिती दिल्याची माहिती तहसीलदार मधूसुदन बर्गे यांनी दिली. आता पुढील सुनावणी १७ जानेवारी रोजी होणार आहे.

नऊ कोटी २३ लाख रुपयांच्या थकीत ऊसबिलाच्या वसुलीसाठी राज्य साखर आयुक्तांनी सोलापूरच्या जिल्हाधिकाऱ्यांना विजय शुगर साखर कारखान्याच्या मालमत्तेची विक्री करून शेतकऱ्यांची थकीत एफआरपीची रक्कम द्यावी, असे आदेश दिले होते. त्यानुसार जिल्हाधिकाऱ्यांनी विजय शुगर कारखान्याच्या विक्री लिलावाची प्रक्रिया सुरू केली होती. त्यानुसार सोमवारी (ता. १८) सकाळी ११ वाजता लिलाव करण्यात येणार होता.

दरम्यान, तहसीलदारांनी न्यायालयाच्या आदेशाने लिलाव स्थगित करत असल्याचे जाहीर जाहीर केले. कारखान्याच्या या लिलावामध्ये बबनराव शिंदे शुगर प्रा. लि., विठ्ठल इंडस्ट्रीज प्रा. लि., टेंभुर्णी आणि बी. पी. रोंगे आदींनी भाग घेतला होता. परंतु, न्यायालयाने स्थगिती दिल्याची माहिती मिळताच लिलावात भाग घेण्यासाठी आलेल्यांचा काहीसा हिरमोड झाला.

लिलाव प्रक्रियेवर जिल्हा बॅंकेची हरकत सोलापूर जिल्हा मध्यवर्ती सहकारी बॅंकेचे विजय शुगर कारखान्याकडे जवळपास १६० कोटी रुपयांचे कर्ज थकले आहे. कर्ज वसुलीसाठी यापूर्वीच जिल्हा मध्यवर्ती सहकारी बॅंकेने विजय शुगर कारखान्याच्या लिलावास परवानगी मागितली आहे. त्यापूर्वीच पंढरपूर येथील विठ्ठल सहकारी साखर कारखाना व परिसरातील शेतकऱ्यांच्या थकीत एफआरपीच्या नऊ कोटी २३ लाख रुपयांच्या वसुलीसाठी न्यायालयाच्या आदेशानुसार साखर आयुक्तांनी लिलाव करण्याचे आदेश दिले होते. त्यानंतर जिल्हा बॅंकेने लिलाव प्रक्रियेवर हरकत घेण्यासाठी न्यायालयात धाव घेतली. त्यानुसार न्यायालयाने विक्री लिलाव करण्यास तात्पुरती स्थगिती दिली आहे.