धामणगावातील ग्रामीण रुग्णालयात तणाव

धामणगाव रेल्वे, अमरावती : नरभक्षक वाघाने बळी घेतलेल्या कुटुंबातील एका सदस्याला शासकीय नोकरी देण्याचे लेखी आश्वासन प्रशासनातर्फे देण्यात येत नाही, तोपर्यंत मृतदेहाचे शवविच्छेदन करायचे नाही, या मागण्या घेऊन येथील ग्रामीण रुग्णालयात जमाव  संतप्त झाला होता. त्यामुळे ग्रामीण रुग्णालय परिसरात तणावाची स्थिती निर्माण झाली होती. अधिकाऱ्यांनी लेखी आश्वासन दिल्यानंतर तब्बल ६ तासांनंतर शवविच्छेदन करण्यात आले.

नरभक्षक वाघाने तालुक्यातील मंगरूळ दस्तगीर येथील राजेंद्र निमकर व अंजनसिंगी येथील मोरेश्वर वाळके यांचा बळी घेतला. त्यामुळे वन विभागाचा निष्काळजीपणा समोर आला आहे, असा आरोप जमावाने केला. दरम्यान अमरावतीचे खासदार आनंद अडसूळ आदींनी भेट दिली. प्रादेशिक विभागाचे मुख्य वन संरक्षक डाॅ. प्रवीण चव्हाण यांनी उपस्थितांसोबत संवाद साधला.

वाघ जेरबंद करणे, बेशुद्ध करून पकडणे याबाबत वरिष्ठांकडून परवानगी प्राप्त होताच तत्काळ कारवाई व त्याची पूर्वतयारी सुरू झाली आहे. दोन्ही कुटुंबांना शासन निर्णयानुसार प्रत्येकी १० लाख रुपये मदत प्रस्ताव प्राप्त होताच देण्यात येईल. दोन्ही कुटुंबांतील एका व्यक्तीस शासकीय सेवेमध्ये सामील करून घेण्याबाबतचा विशेष बाब प्रस्ताव शासनास तत्काळ सादर करण्यात येईल, असे या वेळी सांगण्यात आले. वन संरक्षक हरिश्चंद्र वाघमोडे, उपविभागीय अधिकारी स्नेहल कनिचे, सहायक वन संरक्षक अशोक कवीटकर, तहसीलदार अभिजित नाईक आदी उपस्थित होते.