नाशिक विभागात खरिपासाठी ६२ हजार क्विंटल बियाणे उपलब्ध

नाशिक : नाशिक विभागात पाऊस लांबल्याने चिंता वाढली आहे. याच काळात बियाणे उपलब्ध करण्यासाठी कृषी विभागाला पुरेसा अवधी मिळाला आहे. जूनच्या दुसऱ्या आठवड्यापर्यंत राज्य शासनाच्या महाबीजसह खासगी कंपन्यांनी नाशिक विभागासाठी तब्बल ६२,०८७ क्विंटल बियाणे उपलब्ध करून दिले आहे. यात महाबीजकडे २१,०२१ तर खासगी कंपन्यांकडे ४१,०६६ क्विंटल बियाणे उपलब्ध झाले आहे.

विभागातील नाशिक, जळगाव, धुळे, नंदुरबार या जिल्ह्यांतील शेतकरी पेरणीसाठी पावसाच्या प्रतीक्षेत आहे. दरम्यान बाजारात बियाणे खरेदीसाठी झुंबड उडाली आहे. मागणीच्या तुलनेत अधिक बियाणे उपलब्ध असल्याने शेतकऱ्यांची गैरसोय होणार नाही, असा दावा कृषी विभागाच्या अधिकाऱ्यांनी केला आहे.

विभागात खरिपात ज्वारी, बाजरी, भात, मका, तूर, मूग, उडीद, भुईमूग, सूर्यफूल, तीळ, सोयाबीन, कापूस-सुधारित, बीटी कापूस आणि नागली या पिकांची लागवड केली जाते. विभागातील सर्व भागात सोयाबीन आणि मका पिकाचा पेरा सर्वाधिक होतो. यात मागील काही वर्षांपासून शेतकऱ्यांचा सर्वाधिक कल सोयाबीन पिकाकडे व त्यापाठोपाठ मका पिकाकडे वाढला आहे. हे पाहता यंदाच्या हंगामासाठी सोयाबीन २०,७३३ क्विंटल तर १२,६७३ क्विंटल उपलब्ध करून देण्यात आले आहे.