जळगाव जिल्ह्यात पावसाचा जोर अोसरला

जळगाव  : काही भागांचा अपवाद वगळला तर जिल्ह्यात मागील दोन दिवसांपासून दमदार पाऊस नाही. गुरुवारी (ता.२८) सकाळी आठ वाजेपर्यंत दमदार पाऊस झाला नसल्याचा अहवाल प्रशासनाने दिला आहे.

फक्त चाळीसगाव, पारोळा भागात किरकोळ स्वरूपाचा पाऊस झाला. मुक्ताईनगर, बोदवडध्येही पाच मिलिमीटर पाऊस झाला. जिल्ह्यात पावसाळी वातावरण आहे. रोज काळे ढग जमतात; परंतु जोरदार सरी कोसळलेल्या नाहीत. पेरणी केलेले बियाणे अंकुरतील इतका पाऊस मात्र अनेक भागात झाला आहे.

 अमळनेर तालुक्‍यातील पूर्व भागात तर रावेर, यावल येथे जोरदार पाऊस नाही. मागील आठवड्यातील पावसाने अनुकूल वातावरण असल्याने कापूस व इतर धान्याच्या पेरण्या सुरू आहेत. कडधान्याची पेरणी जवळपास आटोपली असून, त्याचे क्षेत्र सुमारे ८० ते ८५ हजार हेक्‍टरपर्यंत आहे. तृणधान्याची पेरणी सुरू आहे. मुदतीत लागवड व्हावी, यासाठी कमी पाऊस असतानाही काही भागात कापूस लागवड झाली आहे. जोरदार पावसाअभावी सोयाबीनची पेरणी मात्र रखडलेलीच आहे.

सर्वाधिक पाऊस चाळीसगाव तालुक्‍यात झाला आहे. या तालुक्‍यात आतापर्यंत एकूण ७० मिलिमीटरपेक्षा अधिक पाऊस झाला आहे, तर पारोळा, भडगाव भागातही पेरणीलायक पाऊस झाल्याची माहिती मिळाली. जिल्ह्यात हवा तसा पाऊस नसल्याने पश्‍चिम, मध्य भागातील प्रकल्पांमध्ये जलसाठा वाढलेला नाही.