कोल्हापूरात पावसाचा जोर कायम

कोल्हापूर : जिल्ह्यात सोमवार (ता. २५) सायंकाळपासून सर्वदूर पाऊस सुरू आहे. मंगळवार (ता. २६)पर्यंत अनेक ठिकाणी पावसाची संततधार सुरू होती. पश्‍चिमेकडील तालुक्‍यात हलका ते मध्यम स्वरूपाचा पाऊस होता. तर पूर्वेकडील तालुक्‍यात थांबून थांबून हलका पाऊस सुरू होता. जिल्ह्याच्या पश्‍चिम भागात पाऊस सुरू झाल्याने पंचगंगा नदीचे पाणी वाढू लागले आहे. मंगळवारी सकाळी कसबा बावडा येथील राजाराम बंधारा पाण्याखाली गेला.

मंगळवारी (ता. २६) सकाळी आठ वाजता संपलेल्या चोवीस तासांत जिल्ह्यात एकूण ५५०.०६ मि.मी. पावसाची नोंद झाली. जिल्ह्यात गगनबावडा तालुक्‍यात सर्वाधिक १३०.०० मि.मी. पावसाची नोंद झाली. जिल्ह्यात सरासरी ४५.८४ टक्के पाऊस झाला आहे. गगनबावडा, शाहूवाडीसह सर्वच धरणक्षेत्रांत पावसाचा जोर वाढल्याने नद्यांच्या पातळीत कमालीची वाढ झाली आहे. राधानगरी तालुक्‍याच्या पश्‍चिम धामोड भागात काल मध्यरात्रीपासून पावसाचा जोर वाढला आहे. तुळशी जलाशयाच्या पाणलोट क्षेत्रात दमदार पाऊस सुरू असून तुळशी नदीच्या प्रवाहात वाढ झाली आहे. पावसाचा जोर असाच राहिल्यास केळोशी येथील लघू पाटबंधारे प्रकल्प जुलैच्या पहिल्या आठवड्यात भरण्याची शक्‍यता निर्माण झाली आहे. दरम्यान, खामकरवाडी लघू पाटबंधारे प्रकल्पाच्या पाणीपातळीतही वाढ होत आहे.

तालुकानिहाय पाऊस मि.मी.मध्ये याप्रमाणे हातकणंगले १९.७५, शिरोळ ५.४२, पन्हाळा ४०.५७, शाहूवाडी ५४.८३, राधानगरी ६९.००, करवीर ३२.५४, कागल ४२.००, गडहिंग्लज १३.८५, भुदरगड ४२.६०, आजरा ४०.०० व चंदगड ५९.५०.