मिळेल त्या दरात हरभरा विक्री करण्याची शेतकऱ्यांवर वेळ

जळगाव ः जिल्ह्यात २९ मे रोजी शासकीय हरभरा खरेदीनंतर खासगी बाजार व बाजार समित्यांमध्ये हरभऱ्याचे दर व्यापारी लॉबीने आणखी पाडले असून, शेतकऱ्यांना मिळेल त्या दरात हरभरा विक्री करावी लागत आहे. ऐन खरीप हंगामाच्या काळात ही समस्या असल्याने शेतकरी अडचणीत आले आहेत.

जिल्ह्यात ज्या शेतकऱ्यांनी शासकीय खरेदी केंद्रात हरभरा विक्रीबाबत नोंदणी केली होती, त्या सुमारे ३० ते ३२ हजार शेतकऱ्यांच्या ५२ हजार क्विंटल हरभऱ्याची खरेदी मार्केटिंग फेडरेशनने केलेली नाही. खरेदी केंद्रांमध्ये अनेक शेतकऱ्यांचा हरभरा २९ मे नंतर पडून आहे. शेतकऱ्यांनी मध्यंतरी जिल्हा प्रशासनाला निवेदन दिले; परंतु त्याची दखल घेतली नाही. ही दखल घेऊन तातडीने हरभरा खरेदी केंद्र सुरू करावे, अशी मगाणी शेतकरी करीत आहेत.

शासकीय खरेदी बंद झाल्यानंतर व्यापारी मंडळी कमी दरात खरेदी करीत असून, पैसे १० ते १२ दिवसांनंतर देण्याच्या बतावण्या करीत आहेत; परंतु सध्या हंगामाचे दिवस असल्याने बियाणे, मशागती, उधारउसनवारी या बाबी लक्षात घेता शेतकऱ्यांना मिळेल त्या दरात हरभरा विक्रीशिवाय पर्याय नाही. बाजारात दर ३३०० रुपयांपर्यंत खाली आणले आहेत. काबुली हरभऱ्याचे दरही ५२०० रुपयांपर्यंतच आहेत. जळगाव, रावेर, मुक्ताईनगर बाजार समितीत मंदी असल्याचे सांगितले जात आहे.

अमळनेर, जामनेरमधील नेरी बाजारात लागलीच लिलाव केले जातात; परंतु दर अपेक्षित प्रमाणात मिळत नसल्याने शेतकऱ्यांचे नुकसान होत आहे. यावल, चोपडामधील काही शेतकऱ्यांनी नाईलाजाने आपला हरभरा इंदूर, बऱ्हाणूरच्या बाजारात विक्रीसाठी पाठविला; परंतु तेथेही अपेक्षित दर नाहीत. पैसे लागलीच रोकडच्या स्वरूपात तेथे मिळाल्याची माहिती मिळाली.