पंढरीत आज कार्तिकीचा सोहळा

कार्तिक वारी सोहळ्यासाठी पंढरीत मोठ्या संख्येने वारकरी दाखल झाले आहेत. सोमवारी (ता.30) दशमीच्या स्नानासाठी चंद्रभागेवर वारकऱ्यांची मोठी झुंबड उडाली होती.
कार्तिक वारी सोहळ्यासाठी पंढरीत मोठ्या संख्येने वारकरी दाखल झाले आहेत. सोमवारी (ता.30) दशमीच्या स्नानासाठी चंद्रभागेवर वारकऱ्यांची मोठी झुंबड उडाली होती.

सोलापूर : लागोनिया पाया विनवितों तुम्हाला । करें टाळी बोला मुखें नाम ।। विठ्ठल, विठ्ठल म्हणा वेळोवेळा । हा सुखसोहळा स्वर्गी नाही ।। अशी भावना मनात ठेवून कार्तिकी यात्रेच्या सोहळ्यासाठी राज्याच्या विविध भागांतून वारकरी दिंड्या-पताकांसह पंढरपुरात दाखल होऊ लागले आहेत. सोमवारी (ता.३०) सायंकाळपर्यंत सुमारे दोन लाखांहून अधिक वारकरी पंढरपुरात दाखल झाले आहेत.

श्री विठ्ठलाच्या दर्शनाची रांग दर्शन मंडपाचे सर्व मजले भरून चंद्रभागा घाटाच्याही पुढे गेली आहे. टाळ-मृदंगाचा गजर आणि हरिनामाच्या जयघोषाने अवघी पंढरी दुमदुमून गेली आहे. दरम्यान, मंगळवारी (ता. ३१) कार्तिकी यात्रेचा मुख्य सोहळा होत आहे, पहाटे अडीच वाजता राज्याचे महसूलमंत्री चंद्रकांत पाटील यांच्या हस्ते श्री विठ्ठल-रुक्‍मिणीची महापूजा होणार आहे.

महाराष्ट्र राज्यासह इतर राज्यांतूनही वारकरी एसटी, रेल्वेसह खासगी वाहनांनी शहरात दाखल होऊ लागले आहेत. पंढरीतील मठ व धर्मशाळा वारकऱ्यांच्या गर्दीने भरू लागले आहेत. सोलापूर रस्त्यावरील ६५ एकर जागा, चंद्रभागा वाळवंट, मंदिर परिसर, प्रदक्षिणा मार्गासह सर्वच रस्ते वारकऱ्यांच्या गर्दीने फुलले आहेत.

या वर्षी सर्वत्र चांगला पाऊस झाल्याने दरवर्षीपेक्षा यंदा कोकणासह, कर्नाटक, तेलंगणा, तमिळनाडू येथील वारकऱ्यांची संख्या वाढली आहे. वारीसाठी होणारी ही गर्दी लक्षात घेऊन प्रशासनाने यात्रेची जय्यत तयारी केली आहे. सोमवारी उशिरापर्यंत शहरात सुमारे दोन लाखांहून अधिक वारकरी दाखल झाले आहेत.

यात्रेच्या निमित्ताने ६५ एकरांमध्ये तंबू व राहुट्या टाकण्यासाठी दिंडीकऱ्यांची लगबग सुरू झाली आहे. नगरपालिकेने ६५ एकरांसह वाळवंटात पिण्याचे पाणी, वीज आणि स्वच्छतागृहांची सोय केली आहे. यंदा चंद्रभागा नदीत मुबलक पाणी असल्यामुळे नदीवरही स्नानासाठी झुंबड उडाली आहे. त्यात सोमवारी दशमीच्या स्नानाला विशेष महत्त्व असल्याने गर्दीत चांगलीच वाढ झाली आहे.

सोमवारी दुपारपासून गर्दीमध्ये आणखी वाढ झाली. दुपारनंतर पदस्पर्श दर्शनरांग चंद्रभागा घाटाच्यापुढे गेली होती. दर्शन मंडपातील सर्व मजले भरलेले असून, गर्दी वाढू लागली आहे. मंदिरात सध्या २४ तास दर्शन सुरू असल्यामुळे कमी वेळेत श्री विठ्ठलाच्या दर्शनाचा लाभ मिळत आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com