आता कोठे धावे मन । तुझे चरण देखलिया ॥ : आज कार्तिकी

पंढरपूर, सोलापूर (प्रतिनिधी) :  आता कोठे धावे मन । तुझे चरण देखलिया ॥ भाग गेला शीण गेला । अवघा झाला आनंद ॥ संत तुकाराम महाराज यांच्या या अभंग ओवींचा प्रत्येय येथे आपल्या लाडक्या सावळ्या विठुरायाच्या दर्शनासाठी आलेल्या वारकऱ्यांच्या चेहऱ्यावर दिसत आहे. रविवारी (ता. १८) राज्यातून विविध संतांच्या पालख्या आणि दिंड्या पंढरपुरात दाखल झाल्या नंतर, टाळ-मृदंगाचा गजर आणि हरिनामाच्या जयघोषाने अवघी पंढरी दुमदुमून गेली आहे. 

आज (ता. १९) पहाटे महसलूमंत्री चंद्रकांत पाटील यांच्या हस्ते सपत्नीक श्री विठ्ठल-रुक्मिणीची शासकीय महापूजा होणार आहे. गेल्या दोन दिवसांपासून कार्तिकी वारीच्या सोहळ्यात सहभागासाठी राज्यभरातून वारकरी दाखल होत आहेत. रविवारी दुपारपर्यंत सुमारे चार लाखांहून अधिक वारकरी पंढरीत दाखल झाले होते. एसटी, रेल्वेसह खासगी वाहनाने वारकरी पंढरीत येत आहेत. शहरातील विविध मठ, धर्मशाळातून भजन, कीर्तनाचे सूर आळवले जात आहेत. टाळ-मृदंगाच्या गजर आणि हरिनामाच्या जयघोषाने पंढरीत भक्तिरसाचा आगळा उत्साह दाठलेला दिसत आहे. 

रविवारी दशमीच्या स्नानासाठी चंद्रभागेच्या तीरावर वारकऱ्यांची गर्दी झाली आहे. चंद्रभागेतील स्नान आणि विठ्ठलाचे दर्शन, नगरप्रदक्षिणा यामध्ये वारकरी हरपून गेले आहेत. चंद्रभागा नदीचा काठ, वाळवंटाचा परिसर आणि विठ्ठल मंदिराच्या परिसरात वारकऱ्यांची सर्वाधिक गर्दी झाली आहे. रविवारी श्री विठ्ठलाची दर्शन रांग पत्राशेडच्याही पुढे गेली. प्रतिमिनिटाला ४० ते ५० वारकरी दर्शन घेऊन बाहेर पडत होते. किमान दहा ते १२ तास दर्शनाला लागत आहेत. ६५ एकर परिसरातही वारकऱ्यांसाठी आवश्यक सर्व सोई-सुविधा पुरवण्यात आल्या आहेत. यंदा दुष्काळाच्या स्थितीमुळे मराठवाडा, विदर्भातून वारकऱ्यांची संख्या मात्र कमी होण्याची शक्यता आहे.