टोमॅटो उत्पादनाने मिळाला आर्थिक हातभारही

औरंगाबाद : टॅंकरने पाणी टाकून टोमॅटोचे पीक काढणाऱ्या माळीवडगावच्या टोमॅटो उत्पादक शेतकऱ्यांना यंदा केवळ टोमॅटोच्याच दराने तारले. यंदा जवळपास ७५ हजारांवर क्रेट टोमॅटो माळीवडगावातून देशातील विविध बाजारपेठांत गेले. थेट व्यापाऱ्यांचे प्रतिनिधीच गावात तळ ठोकून असल्याने काही लोकांना रोजगार व उत्पादकांना अपेक्षित दर मिळून आर्थिक हातभार लागण्याचे काम टोमॅटोच्या एकूणच उलाढालीतून झाले.

जवळपास ३०० उंबऱ्यांच्या माळीवडगावातील ४० ते ५० शेतकऱ्यांनी तीन वर्षांपासून टोमॅटोचे पीक घेणे सुरू केले आहे. जळपास ८० ते ९० एकरांवर टोमॅटोचे पीक असून १ ते ७ एकरांपर्यंत शेतकऱ्यांकडे टोमॅटोचे पीक यंदा होते.

एकाच ठिकाणी चांगल्या दर्जाचे टोमॅटो मिळत असल्याने दिल्ली, राजस्थान, हरियाना, झाशी आदी ठिकाणांवरून टोमॅटो व्यापाऱ्यांनी आपले प्रतिनिधी माळीवडगावात पाठविणे सुरू केले. आलेल्या व्यापाऱ्यांनी गावातील युवा टोमॅटो उत्पादक शेतकऱ्यांना मध्यस्थ करून त्यांच्यामार्फत शेतकऱ्यांकडून टोमॅटोची खरेदी केली. त्यामुळे गावातील सात ते आठ शेतकऱ्यांना रोजगार मिळाला. सोबतच गावातील आठ ते दहा मालवाहू वाहनांनाही गावातच जवळपास अडीच-तीन महिने बऱ्यापैकी काम मिळाले.

यंदा माळीवडगावातील टोमॅटोला १७० ते ९०० रुपयांपर्यंत देशाच्या विविध बाजारांत दर मिळाल्याची माहिती शेतकऱ्यांनी दिली. यंदा उत्पादक शेतकऱ्यांपैकी जवळपास ७० टक्‍के शेतकऱ्यांनी दुर्रीचे पीक घेतले. ७५ हजार क्रेट मालाचे उत्पादन देशाच्या विविध बाजारांत गेले असले, तरी यंदा किमान १५ ते २० हजार क्रेट टोमॅटो अमरावती, परभणी, औरंगाबाद व इतर लोकल बाजारांत गेले.

२०१६ मध्ये पाच ते सहा शेतकऱ्यांमार्फत जवळपास ९० हजार क्रेट टोमॅटो विविध राज्यांतील बाजारपेठांत पाठविले होते. टंचाईमुळे पाण्याचे महत्त्व ओळखलेल्या माळीवडगाववासीयांनी जलसंधारणाच्या कामात योगदान देण्यासाठीही पुढाकार घेणे सुरू केले आहे.

पाण्याची भीषण टंचाई असताना शेतकऱ्यांनी धाडसाने टोमॅटोची लागवड केली व टॅंकरने पाणी देऊन उत्पादन घेतले. सरासरी चांगले दर मिळाले. सोबतच ७५ हजारांवर क्रेट देशाच्या विविध बाजारांत गेले. केवळ रोजगारच मिळाला नाही, इतर पिकांच्या तुलनेत टोमॅटोने मोठा आधार दिला. - विलास गवळी, शेतकरी, माळीवडगाव, जि. औरंगाबाद.

व्यापाऱ्यांशी थेट संपर्क आल्याने देशातील बाजारपेठांची दरस्थिती, त्यामधील चढउतार कधी व केव्हा असतात हे कळले. खरेदीतील मध्यस्थीमुळे उत्पादनाबरोबरच थोडीबहूत अर्थार्जनाचीही संधी मिळाली. - सोमीनाथ गोरे, शेतकरी माळीवडगाव, जि. औरंगाबाद.

गावातील एकूण शेतकऱ्यांपैकी जवळपास दहा टक्‍केच शेतकरी टोमॅटोचे उत्पादन घेतात. त्यापैकी काहींकडे शेततळे आहे. ज्यांनी टोमॅटोचे उत्पादन यंदा घेतले त्यांना इतर पिकाच्या तुलनेत चांगला पैसा मिळाला. - विठ्‌ठल जिते, शेतकरी जि. औरंगाबाद.