गारमेंट हबसाठी सर्वांनी मिळून करू प्रयत्न

सोलापूर  : सोलापुरातील चादर व टॉवेल जगात प्रसिद्ध आहे. त्याचप्रमाणे सोलापुरात स्वस्तात गणवेश तयार होत असल्याने याचे मार्केटिंग देशातच नव्हे आंतरराष्ट्रीय स्तरावर व्हायला हवे. येथे टेक्‍स्टाइल पार्क आवश्‍यक असून, मेगा क्‍लस्टरसाठी जागेचा शोध सुरू आहे. वस्त्रोद्योगाला पोषक असे सोलापूर गारमेंट हब होण्यासाठी सर्वांनी मिळून प्रयत्न करू, असे प्रतिपादन सहकार, पणन व वस्त्रोद्योगमंत्री सुभाष देशमुख यांनी केले.

श्री. सोलापूर रेडिमेड कापड उत्पादक संघातर्फे हॉटेल बालाजी सरोवर प्रीमिअर येथे शनिवारी (ता. २७) सकाळी द्वितीय आंतरराष्ट्रीय गणवेश व वस्त्र प्रदर्शनाचे उद्‌घाटन वस्त्रोद्योगमंत्री श्री. देशमुख यांच्या हस्ते झाले. या वेळी ते बोलत होते.

पालकमंत्री विजयकुमार देशमुख, अध्यक्ष रामवल्लभ जाजू, उपाध्यक्ष नीलेश शाह, मफतलाल इंडस्ट्रीचे ऋषिकेश मफतलाल, विपणन विभागाचे अध्यक्ष एम. बी. रघुनाथ आदी उपस्थित होते.

वस्त्रोद्योगमंत्री श्री. देशमुख पुढे म्हणाले, की धूम्रपानविरोधी कायद्यामुळे येथील विडी उद्योग डबघाईला आला आहे. यातील ७० हजार कामगारांना गारमेंट उद्योगात रोजगार मिळवून देऊ. कौशल्य विकासाच्या माध्यमातून प्रशिक्षण केंद्र सुरू करू. गारमेंट क्‍लस्टर उभारणीसाठी होटगी येथे जागेचा शोध घेत आहोत. त्याचबरोबर चिंचोळी एमआयडीसी, अक्कलकोट रोड येथेही गारमेंट पार्कसाठी प्रयत्न सुरू आहेत. हिरज (ता. उत्तर सोलापूर) येथे रेशीम पार्कसाठी १० एकर जागा मिळाली आहे. २०२२ च्या वस्त्रोद्योग धोरणात विशेष करून गारमेंट उद्योगाला प्राधान्य देणार.

पालकमंत्री श्री. देशमुख म्हणाले, सरकारी धोरणामुळे विडी व यंत्रमाग उद्योग अडचणीत आले आहेत. मात्र १९७० पासून छोट्या गारमेंट उद्योगाचे मोठ्या उद्योगात रूपांतर होत आहे.