तुपकर-पटोले यांच्या भेटीने अनेकांच्या भुवया उंचावल्या

अकोला : भाजपचे खासदार नाना पटोले गेले काही दिवसांपासून सातत्याने सरकारवर टीका करत आहेत. अद्यापही त्यांची ‘मन की बात’ कुणालाच समजलेली नाही. मात्र खासदार पटोले यांनी बुलडाणा जिल्हा दौऱ्यावर असताना चिखली येथे स्वाभिमानी शेतकरी संघटनेचे नेते रविकांत तुपकर यांच्याशी तासभर बंद द्वार चर्चा केल्याने अनेकांच्या भुवया उंचावल्या अाहेत. या चर्चेत सोयाबीन, कापूस अाणि धान उत्पादक शेतकऱ्यांच्या समस्यांवर सामूहिक अांदोलनाची रणनिती अाखल्याचे सांगितले जात आहे.

रविकांत तुपकर हे स्वाभिमानी शेतकरी संघटना सरकारमधून बाहेर पडल्यापासून सातत्याने सरकारविरोधी टीका करीत अाहेत. तसेच खासदार पटोलेदेखील श्री. तुपकरांच्या साथीने सोयाबीन, कापूस तसेच धान उत्पादक शेतकऱ्यांच्या प्रश्नावर मोठा लढा उभा करण्याची शक्यता अाहे.

खासदार पटोले यांनी खासदार राजू शेट्टी यांच्या नेतृत्वात २० नोव्हेंबरला कोल्हापूरला निघणाऱ्या मोर्चात सहभागी होणार असल्याचे अाधीच म्हटले अाहे. त्यादृष्टीने या बैठकीचे महत्त्व वाढले.

खासदार पटोले यांची भाजप सरकारवरील नाराजी अद्यापही कुणाला कळालेली नाही. श्री. पटोले देखील मिळेल तेव्हा टीका करण्याची संधी सोडत नाहीत. त्यामुळेच अाता विरोधकही त्यांचे चाहते बनत अाहेत. तुपकरांनी तर सध्या सरकारविरुद्ध टीकेचे सत्रच सुरू केले आहे. हे दोन्ही आक्रमक शेतकरी नेते एकत्र आल्यास विदर्भात शेतकरी चळवळ वाढू शकते.

खासदार पटोले व तुपकर यांनी चिखलीत एका कार्यक्रमात सोबतच उपस्थिती लावली होती. यावेळी त्यांनी भाजप सरकारवर हल्ला चढविला. सोयाबीन, कापूस व धान उत्पादक शेतकरी सरकारच्या चुकीच्या धोरणामुळे देशोधडीला लागले. शासनाने नोटाबंदी, जीएसटीसारखे निर्णय घेऊन शेतकरी तसेच सर्वसामान्य जनतेचे जगणे मुश्कील केल्याचा आरोप केला.

या कार्यक्रमात खासदार पटोलेंनी, रविकांत तुपकर हे माझे छोटे बंधू असल्याचे व शेतकरी शेतमजुरांचे खरे नेते असल्याचे सांगत त्यांना जनतेने साथ दिली पाहिजे, असे अावाहन केले होते. या कार्यक्रमानंतर दोघांमध्ये तासभर बंद द्वार चर्चा झाली.