जळगाव : जिल्ह्यात शासकीय तूर खरेदी केंद्र सुरू करण्यासंबंधी मार्केटिंग फेडरेशनने प्राथमिक तयारी केली असून, जिल्हाभरातील १० तालुक्यांच्या शेतकरी संघांना खरेदीसंबंधी ऑनलाइन नोंदणीच्या सूचना दिल्या आहेत. यंदा मनुष्यबळाअभावी पाच तालुक्यांमध्ये तूर खरेदी केंद्र सुरू होणार नसल्याची माहिती मिळाली आहे.
तुरीला शासकीय यंत्रणांनी ५४५० रुपये प्रतिक्विंटल दर जाहीर केला आहे. दर्जेदार, कचरारहित तूर या केंद्रात खरेदी केली जाईल. त्यासंबंधीचे निकषही जारी केले आहेत. जिल्ह्यात यंदा भडगाव, यावल, भुसावळ, धरणगाव व पारोळा या तालुक्यांमध्ये तूर खरेदी केंद्र सुरू होणार नाहीत. उर्वरित १० तालुक्यांमध्ये केंद्र असतील. त्यात जळगाव, मुक्ताईनगर, बोदवड, जामनेर, रावेर, अमळनेर, चाळीसगाव, पाचोरा, चोपडा व एरंडोल येथे तूर खरेदी केंद्र सुरू होतील. संबंधित तालुक्यांच्या शेतकरी सहकारी खरेदी विक्री संघांची सबएजंट म्हणून मार्केटिंग फेडरेशनने नियुक्ती केली आहे.
तूर उत्पादकांना ऑनलाइन नोंदणी बंधनकारक आहे. नोंदणी शेतकरी संघात केली जाईल. त्यासाठी तूर पिकाची नोंद असलेला अलीकडचा सात बारा उतारा, शेतकऱ्यांच्या बॅंक खात्याच्या पासबुकची झेरॉक्स, आधार कार्ड याची गरज आहे. तूर विक्रीची रक्कम थेट शेतकऱ्याच्या खात्यात जमा होईल.
जिल्ह्यात तूर काढणी पुढील महिन्यात खऱ्या अर्थाने सुरू होईल. जानेवारीअखेर तूर काढणी वेगात असते. जिल्ह्यात सुमारे सहा हजार हेक्टरवर तुरीची पेरणी झाली होती. उत्पादनही यंदा बऱ्यापैकी येईल, असे चित्र आहे. ही बाब लक्षात घेता जानेवारी २०१८ च्या मध्यात तूर खरेदी केंद्र सुरू करण्याचे नियोजन मार्केटिंग फेडरेशन करीत असल्याची माहिती मिळाली.