बुलडाणा ः जिल्ह्यात नाफेडमार्फत अातापर्यंत सव्वातीन लाख क्विंटलपर्यंत तूर खरेदी झाली असून, सध्या ठेवायला जागा नसल्याने शेगाव वगळता सर्वच ठिकाणी तूर खरेदी केंद्रे बंद पडली अाहेत. साठवणुकीसाठी गोदामांची व्यवस्था केली जावी, अशी मागणी जिल्हा मार्केटिंग विभागाने शासनाकडे केल्याची माहिती अाहे. मात्र अद्याप यावर कुठलाही तोडगा काढण्यात अाला नसून तूर खरेदीची मुदत अवघी अाठ दिवसांनी (१८ एप्रिल) संपत अाहे.
या हंगामात फेब्रुवारीमध्ये तूर खरेदी सुरू करण्यात अाली. अातापर्यंत नाफेडने अाधारभूत किमतीने सव्वातीन लाख क्विंटलपेक्षा अधिक तूर खरेदी केली अाहे. मात्र अाता शेगाव येथील केंद्र वगळता इतरत्र तूर साठवणुकीसाठी जागाच नाही. जागेअभावी सुमारे ३० हजार क्विंटल तूर वेगवेगळ्या केंद्रांवर पडून अाहे. अाधी या मालाची उचल केल्यानंतर जागा तयार झाल्यावर नवीन खरेदीची प्रक्रिया केली जाईल.
जिल्ह्यातील सर्व गोदामांमध्ये धान्य साठवलेले असल्याने कुठेच जागा शिल्लक नाही. अाता शासनाला एकतर शासकीय गोदामांमधील धान्य अन्यत्र हलवावे लागेल किंवा भाडेतत्त्वावर खासगी गोदाम ताब्यात घ्यावे लागणार अाहे. हे गोदाम जोपर्यंत उपलब्ध होत नाही तोवर खरेदी सुरू करण्यात अडचणी अाहेत. जिल्हा प्रशासनाने साठवणुकीची समस्या सोडवण्यासाठी गोदामांची मागणी केली असून शासन स्तरावरून तातडीने निर्णय घेण्याची अपेक्षा व्यक्त केली जात अाहे.
या हंगामात अाधारभूत किंमत खरेदी योजनेअंतर्गत सुरू असलेली तूर खरेदीची मुदत १८ एप्रिलपर्यंत अाहे. अाता प्रशासनाकडे केवळ अाठ दिवसांचा कालावधी शिल्लक अाहे. फेब्रुवारीमध्ये सुरू झालेली खरेदी सुरवातीला अवघी महिना-दीड महिना सुरळीत झाली. नंतर बारदाना तर कधी ठेवायला जागा नसल्याने खरेदीत खोडा घातला गेला. अाता ही खरेदी बुधवारी (ता.१८) संपणार अाहे.
अातापर्यंत अाॅनलाइन नोंदणी झालेल्या ५० टक्के शेतकऱ्यांची तूर खरेदी झालेली नाही. शिवाय चुकाऱ्यांबाबतही संथगती अाहे. सध्या १७ मार्चपर्यंतचे चुकारे झाल्याचे समजते. जवळपास २० ते २५ दिवस ही चुकाऱ्यांची गती मागे पडलेली अाहे.
