जळगाव ः जिल्ह्यात शासकीय तूर खरेदी केंद्र मागील महिनाभरापासून सुरू असून, खरेदीला वेग आला आहे. आजघडीला शासकीय केंद्रांवर सुमारे आठ हजार क्विंटलपर्यंत तूर खरेदी झाली आहे. शासकीय खरेदी केंद्रांमुळे खासगी बाजारातील तूर दरातही काहीशी सुधारणा झाली असून, दर ४४०० रुपये क्विंटलपर्यंत गेले आहेत. देशी वाणांच्या गावरान प्रकारातील तुरीला अधिक दर असून, शेतकऱ्यांना शेतातच पाच हजार रुपये क्विंटल दर मिळत असल्याची माहिती मिळाली.
संकरित प्रकारच्या तुरीला गावरान तुरीच्या तुलनेत कमी दर असले, तरी अलीकडे खासगी बाजारात दरात सुधारणा झाली आहे; परंतु जळगावसह अमळनेर येथील बाजार समितीमध्ये तुरीची आवक अतिशय नगण्य अशीच आहे. जिल्ह्यात तुरीच्या उत्पादनात जामनेर, मुक्ताईनगर, रावेर, अमळनेर भाग आघाडीवर आहे. या भागातील कोणत्याही बाजार समितीमध्ये सध्या तुरीची आवक अधिक नसल्याचे सांगण्यात आले. शासकीय खरेदीदर ५४५० रुपये प्रतिक्विंटल आहे; तसेच चुकारे आठ ते १० दिवसांत मिळत असल्याने शासकीय खरेदी केंद्रांत तूर विक्रीकडे शेतकऱ्यांचा कल आहे.
जिल्ह्यात यंदा सुमारे अडीच हजार हेक्टरवर तुरीची लागवड झाली होती. मागील वर्षी तूर लागवड सुमारे आठ हजार हेक्टरवर होती. यंदा लागवडही कमी असल्याने बाजारातील आवकदेखील कमी आहे. फेब्रुवारीच्या सुरवातीला आवक होती. दरही ३५०० ते ४००० रुपये क्विंटलपर्यंत होते; परंतु आता दरात थोडी सुधारणा झालेली आहे, असे काही अडतदारांचे म्हणणे आहे.
यंदा लागवड कमी होती; पण उत्पादन बऱ्यापैकी आहे. रावेर, जामनेर व मुक्ताईनगर भागात शेतकरी तुरीच्या उत्पादनाकडे वळले आहेत. त्यामुळे या भागातील मोठ्या शेतकऱ्यांनी तूर साठवून ठेवली आहे. दरवाढीची प्रतीक्षा अजूनही काही शेतकरी करीत असल्याची माहिती मिळाली.