नांदेड : केंद्र शासनाच्या किंमत समर्थन मूल्य योजनेअंतर्गत नांदेड, परभणी, हिंगोली या तीन जिल्ह्यांत बुधवारपर्यंत (ता. १४) खरेदी करण्यात आलेल्या ९५ हजार क्विंटल तुरीपैकी ५८ हजार क्विंटल तूर खरेदी केंद्रावर पडून असल्यामुळे शेतकऱ्यांना तुरीचे चुकारे मिळण्यासाठी प्रतीक्षा करावी लागणार आहे.
खुल्या बाजारातील दर कोसळ्यामुळे फेब्रुवारी महिन्यापासून केंद्र शासनाच्या किंमत समर्थयोजनेअंतर्गत आधारभूत किंमत दराने नाफेड आणि विदर्भ को आॅपरेटिव्ह मार्केटिंग फेडरेशतर्फे तूर खरेदी सुरू करण्यात आली आहे. बुधवारपर्यंत (ता. १४) नांदेड जिल्ह्यात नाफेडतर्फे ५७८३ शेतकऱ्यांची ५६,३०६, परभणी जिल्ह्यात नाफेड आणि विदर्भ को-आॅपरेटिव्ह मार्केटिंग फेडरेशनतर्फे १३९९ शेतकऱ्यांची २१,२४६, हिंगोली जिल्ह्यात नाफेडतर्फे १७५२ शेतकऱ्यांची १६ हजार ९८३ अशी तीन जिल्ह्यांत एकूण ८९३४ शेतकऱ्यांची ९५ हजार ३५ क्विंटल तूर खरेदी करण्यात आली आहे.
शेतकऱ्यांना तुरीचे चुकारे अदा करण्यासाठी शासकीय खरेदी केंद्रावरील तूर वखार महामंडळाच्या गोदामात ती साठविणे आवश्यक आहे. परंतु या तीन जिल्ह्यांत वखार महामंडळाच्या गोदामात जागा नसल्यामुळे खरेदी केंद्रावर ५८ हजार ४३२ क्विंटल तूर पडून आहे. त्यामुळे शेतकऱ्यांना चुकारे मिळण्यास वेळ लागणार आहे.
वखार महामंडळाने काही ठिकाणी खासगी गोदामे भाडेतत्त्वावर घेतली आहेत. तरीही खरेदी केलेली तूर साठविण्यासाठी जागा अपुरी पडत असल्यामुळे शेतकऱ्यांना तुरीचे चुकारे मिळण्यासाठी प्रतीक्षा करावी लागत आहे. दरम्यान, खरेदी केंद्रावरील गोदामात जागा अपुरी पडत असल्यामुळे नाफेडचे बोरी (ता. जिंतूर) येथील केंद्रावर तूर खरेदी बंद रहात आहे. त्यामुळे शेतकऱ्यांची हेळसांड होत आहे.
