तूर विक्रीचे चुकारे मिळेनात; शेतकरी त्रस्त

जळगाव : नाफेडच्या माध्यमातून मार्केटिंग फेडरेशनने सुरू केलेल्या शासकीय खरेदी केंद्रांवर तुरीची विक्री केलेल्या सुमारे १० टक्के शेतकऱ्यांना दोन महिने उलटूनही चुकारे मिळालेले नाहीत. त्यामुळे शेतकरी त्रस्त झाले आहेत.

तूर विक्रीसाठी ऑनलाइन नोंदणी करताना घेतलेल्या बॅंक खाते व आधार, पॅन क्रमांक संबंधित चुका कर्मचाऱ्यांनी करून ठेवल्याने अनेक जण चुकाऱ्यांपासून वंचित आहेत. या चुका तूर विक्रीसंबंधी सब एजंट म्हणून काम केलेल्या शेतकी संघांच्या कर्मचाऱ्यांनी केल्या आहेत.

शेतकी संघात विचारणा करायला गेल्यास शेतकऱ्यांना बॅंकेत पाठविले जाते. या ठिकाणी दिशाभूल केली जात असल्याच्या तक्रारी शेतकरी करीत आहेत. मार्केटिंग फेडरेशनचे कार्यालय जळगाव शहरात आहे, त्यामुळे अधिक लांब अंतरावरून शेतकरी जळगावात येऊन फेडरेशनच्या कार्यालयात विचारणा करीत नाहीत. सुमारे ७८ हजार क्विंटल तुरीची खरेदी नऊ शासकीय खरेदी केंद्रांवर झाली होती.

तुरीची जळगाव येथील केंद्रात अडीच महिन्यांपूर्वी विक्री केली होती. परंतु, अजूनही चुकारे मिळालेले नाहीत. रोज शहरात संबंधितांकडे जातो, परंतु कुणी दखल घेत नाही, अशी भावना एका तूर उत्पादकाने व्यक्त केली.

  हरभरा उत्पादकांना १००० रुपये अनुदान नाफेडच्या हरभरा खरेदी केंद्रात हरभरा विक्रीसाठी नोंदणी केली, परंतु हरभऱ्याची विक्री केंद्र बंद झाल्याने होऊ शकली नाही, अशा शेतकऱ्यांना १००० रुपये अनुदान एक क्विंटलमागे एक हेक्‍टर मर्यादेसाठी दिले जाणार आहे. या संदर्भात जिल्ह्यात तहसील कार्यालयांमध्ये संबंधित नोंदणीकृत शेतकऱ्यांच्या सातबारा उताऱ्यावरील नोंदी, क्षेत्र यांची पडताळणी सुरू आहे. सुमारे १७०० शेतकरी जिल्ह्यात हरभरा विक्रीपासून वंचित राहिले होते. उताऱ्यावरील नोंदींची पडताळणी झाल्यानंतर संबंधित माहिती मार्केटिंग फेडरेशन शासनाकडे पाठविल, असे मार्केटिंग फेडरेशनचे पणन अधिकारी परिमल साळुंखे यांनी सांगितले.