सांगली जिल्ह्यात हळद काढणीची लगबग सुरू

सांगली   ः जिल्ह्यातील हळद राज्यात प्रसिद्ध आहे. जिल्ह्यात हळदीला मोठी बाजारपेठही आहे. त्याचप्रमाणे हळदीचे क्षेत्र ही जास्त आहे. यंदाचा हळद हंगाम सुरू झाल्याने जिल्ह्यातील शेतकरी हळद काढणीसाठी नियोजन करू लागले आहेत. सध्या अनेक ठिकाणी हळद काढणीची लगबग सुरू झाली आहे.

जिल्ह्यात गेल्यावर्षी हळदीचे क्षेत्र १०६० हेक्‍टर होते. यंदा हळदीच्या क्षेत्रात २४० हेक्‍टरने वाढ झाली आहे. यंदा हळदीचे एकूण क्षेत्र सुमारे १३०० हेक्‍टर आहे. जिल्ह्यात ८० टक्के क्षेत्रावर सेलम, १५ टक्के क्षेत्रावर कृष्णा, ५ टक्के क्षेत्रावर फुले स्वरूपा या जातीच्या हळदीची लागवड करण्यात येते. हंगाम सुरू झाल्याने हळद उत्पादक पीक काढणीत व्यस्त झाले आहेत. अनेक शेतकऱ्यांनी पाण्याची उपलब्धता पाहून हळदीची लागवड केली होती. त्यामुळे आगाप केलेल्या हळदीच्या लागवडीची काढणी सुरू झाली आहे.

सध्या वाळवा तालुक्‍यात हळद काढणीचा प्रारंभ झाला आहे. येत्या पंधरा दिवसांनंतर हळद काढणीला गती येणार असल्याचे शेतकऱ्यांनी सांगितले. सध्या जिल्ह्यातील पलूस, वाळवा, मिरज तालुक्‍यांतील शेतकरी हळद काढणीसाठी नियोजन करत आहेत. या भागात हळदीची काढणी यंत्राद्वारे केली जाते आहे. हळद काढणीसाठी मजुरांची कमतरता जाणवत आहे. हळद काढणीसाठी सध्या १५ टक्के शेतकरी यंत्राचा वापर करत आहे तर ७० ते ८० टक्के शेतकरी हळदीची काढणी मजुरांद्वारे करीत आहेत.