पारंपरिक पिकाला पर्याय म्हणून रेशीमकडे वळा : अजय मोहिते

लाडसावंगी,जि. औरंगाबाद : बदलत्या नैसर्गिक वातावरणामुळे कापूस पिकावरील बोंड अळीच्या प्रादुर्भावामुळे मोठ्या प्रमाणात उत्पन्नात घट होऊन नुकसान झाले आहे. याला पर्याय म्हणून शेतकऱ्यांनी पारंपरिक पिकांऐवजी कमीत कमी खर्चात, कमी कालावधीत आणि कमी श्रमात हमखास उत्पन्न मिळवून देणाऱ्या रेशीमकडे वळण्याचा सल्ला जिल्हा रेशीम कार्यालयाचे वरिष्ठ तांत्रिक सहायक अजय मोहिते यांनी दिला.

महाराष्ट्र शासन वस्त्रोउद्योग विभागाच्या जिल्हा रेशीम कार्यालय औरंगाबाद व डॉ. बाबासाहेब आंबेडकर संशोधन व प्रशिक्षण संस्था बार्टी, पुणे यांच्या संयुक्त विद्यमाने १ ते ३० नोव्हेंबर २०१७ दरम्यान महारेशीम अभियान आयोजित केलेले आहे. त्यासाठी प्रत्येक गावात जाऊन शेतकऱ्यांना मार्गदर्शन करण्यात येत आहे. याचाच भाग म्हणून पिंपळखुंटा (ता. औरंगाबाद) येथे नुकत्याच आयोजित केलेल्या कार्यक्रमात ते बोलत होते.

अजय मोहिते म्हणाले, हमखास येणारे पीक म्हणजे रेशीम शेती होय. पारंपरिक पिकांना रेशीम शेती एक उत्तम पर्याय आहे. त्याचबरोबर रेशीम शेतीसाठी शासनाकडून मनरेगा योजनेतून अनुदानाची तरतूद करण्यात आलेली आहे. शेतकऱ्यांनी योजनेत सहभागी होऊन पारंपरिक शेतीसोबत रेशीम शेती करावी.

या वेळी बार्टीचे समतादूत सुभाष राठोड, सरपंच दगडू डोंगरे, शेतकरी रामदास कुबेर, अविनाश दाभाडे, रामेश्वर दाभाडे, भाऊसाहेब पडूळ, भगवान पडूळ, प्रदीप दाभाडे, विष्णू दाभाडे, निवृत्ती पडूळ, प्रकाश दाभाडे, पांडुरंग पडूळ, नामदेव दाभाडे, अशोक पडूळ, अंबादास पडूळ, भगवान पवार, गणेश हेकाडे, उत्तम आहेरकर, देवराव पडूळ, निवृत्ती दाभाडे, उद्धव दाभाडे, रावसाहेब पवार, ईश्वर बैनाडे, रामसिंग बारवाल, नाबाजी दाभाडे, संजय दाभाडे आदींसह शेतकऱ्यांच्या उपस्थितीत अॅग्रोवन सेंद्रिय शेती विशेषांकांचे वाटप करण्यात आले.