‘उजनी’तील पाणीसाठा उणे पातळीत

उजनी पाणीपातळी
उजनी पाणीपातळी

सोलापूर  ः सोलापूर जिल्ह्याची वरदायिनी असलेल्या उजनी धरणातील पाणीपातळी प्रतिदिन दोन टक्के या गतीने घटत असून, यंदाच्या हंगामात पुण्यातील पावसावर शंभर टक्के भरलेले धरण अवघ्या २०१ दिवसांमध्ये शून्यावर आले आहे. त्यामुळे धरणातील पाण्याची पातळी सध्या उणे दोन टक्क्यांवर आली आहे. परिणामी आगामी काळात पाण्याचे संकट आणखी वाढण्याची चिन्हे आहेत.  सोलापूर जिल्ह्यात गतवर्षी हंगामात जेमतेम ३८ टक्के पाऊस झाला. मात्र, उजनी धरणाच्या वरच्या बाजूच्या पाणलोट क्षेत्रात पुणे जिल्ह्यात असलेल्या १४ धरणांतून उजनीत पाणी सोडण्यात आले. परिणामी जिल्ह्यात पाऊस कमी असतानाही या धरणाच्या पाण्यावर धरणाची पाणीपातळी वाढली. या पाण्यावरच पुढे २७ ऑगस्टला उजनी धरण १०० टक्के भरले. त्या वेळी धरणातील एकूण पाणीसाठा ११७.२३ टीएमसी तर उपयुक्त पाणीसाठा ५३.५७ टीएमसी इतका होता. त्यानंतर जवळपास २०१ दिवसांनी धरणातील एकूण पाणीसाठा ६४ टीएमसी इतका तर उपयुक्त पाणीसाठा हा शून्यावर आला आहे. २०१ दिवसांचा विचार केला तर धरण १०० टक्के भरल्यापासून दररोज साधारणपणे दोन टक्के पाणीसाठा कमी होत गेला आहे. पाण्याच्या घटत्या पातळीमुळे पाण्याचे संकट आणखी गडद होणार आहे.  आधीच दुष्काळामुळे जिल्ह्याचा ग्रामीण भाग होरपळून निघाला आहे. त्यात आता उजनीच्या पाण्याच्या प्रश्‍नाने दुष्काळाची दाहकता अधिकच वाढली आहे. मंगळवारी (ता. १९) धरणातील एकूण पाणीपातळी १७७२ मीटर तर एकूण साठा ६२.६९ टीएमसी इतका होता. त्यापैकी उपयुक्त साठा उणे १.०७ टीएमसी इतका शिल्लक होता, तर या पाण्याची एकूण टक्केवारी उणे दोन टक्क्यांपर्यंत होती. कालवा, बोगद्यातून पाणी सुरू, शहरालाही पाणी सोडणार सध्या धरणातून कालव्याच्या माध्यमातून तीन हजार २०० क्‍सुसेक, बोगद्याच्या माध्यमातून ६५० क्‍सुसेकने पाणी सोडले जात आहे. कालव्याचे हे आवर्तन पाच एप्रिलपर्यंत सुरू राहण्याची शक्‍यता आहे, पण हे आवर्तन संपण्यापूर्वीच सोलापूर शहरासाठी पाणी सोडावे लागणार आहे. तसेच दीडशेहून अधिक नळ योजना याच धरणावर अवलंबून आहेत. एवढा भार सध्या धरणावर पडतो आहे. उन्हाचा वाढता तडाखा असाच कायम राहिला तर पाणीपातळी आणखी खालावली जाणार आहे.   

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com