नेमका गरजेवेळी युरिया जातो कुठे?

जळगाव  ः जिल्ह्यात मागील काही दिवसांत चांगला पाऊस झाल्याने सरळ खतांची मागणी वाढली आहे. परंतु युरिया पुरेशा प्रमाणात मिळत नाही. शिवाय अनेक खत विक्रेते ई-पॉसचा वापर करीत नाहीत. तसेच जादा दरात युरियाची विक्री करीत असल्याचे प्रकार सुरू आहेत. गरज असते त्या वेळी नेमका युरिया उपलब्ध होत नाहीत, अशा तक्रारी शेतकऱ्यांनी केल्या आहेत.  जिल्ह्यात सुमारे १००० खत विक्रेते आहेत. यातील सर्वांनाच ई-पॉस मशिनचे वितरण केले आहे. या मशिनमध्ये खते विक्रीची नोंद करून विक्री बंधनकारक आहे. याच मशिनमधून आलेले बिलही शेतकऱ्यांना द्यायच्या सूचना आहेत. परंतु जळगाव, पाचोरा, जामनेर, चाळीसगाव, चोपडा, रावेर, यावल भागात अनेक खत विक्रेते फक्त प्रयोग म्हणून या मशिनचा वापर करतात. पाच-दहा व्यवहार या मशिनचा वापर करून करतात. परंतु एरवी सर्रास खतांची विक्री करून पुस्तकातील पावत्यांच्या स्वरूपातील बिल शेतकऱ्यांना दिले जात आहे. युरियावर जामनेर, चाळीसगाव, अमळनेर भागात लिंकिंग सुरू आहे. १० गोण्यांवर एक ३०० ते ४०० रुपयांचे विद्राव्य खत किंवा इतर अन्नद्रव्ये शेतकऱ्यांच्या माथी मारतात.  वाहतूक भाडेही वसूल युरिया वाहतुकीसाठी काही ठिकाणी पाच रुपये, काही ठिकाणी दहा तर रावेर, चाळीसगाव, अमळनेरसाठी १५ रुपयांपर्यंत खर्च येतो. या भागात हे वाहतूक भाडे शेतकऱ्यांकडून वसूल केले जात आहे. बिलावर मात्र त्याची नोंद नसते. जिल्ह्यात काही कंपन्यांनी खतपुरवठा केला आहे. परंतु ग्रामीण भागापर्यंत अजून पुरेसा युरिया पोचला नाही. युरियाचा ५० टक्केच पुरवठा झाल्याची माहिती आहे, तर संयुक्त खतांचा मिळून ६४ टक्‍क्‍यांपर्यंत पुरवठा झाला आहे. सुपर फॉस्फेट, पोटॅशचा पुरवठा ५० टक्‍क्‍यांवर झाला आहे, अशी माहिती मिळाली.