‘वसाका`च्या खासगीकरणाचा ठराव

कळवण, जि. नाशिक  : वसंतदादा पाटील सहकारी साखर कारखान्याचे सभासद व कामगारांचे हक्क अबाधित ठेवून कारखाना भाडेतत्त्वावर खासगी व्यापाऱ्यास चालविण्यास देण्यात यावा, असा ठराव मंगळवारी (ता. २८) वसाका कार्यस्थळावर झालेल्या विशेष सभेत मंजूर करण्यात आला.

वसाका भाडेतत्त्वावर देण्यासंदर्भात येथील श्रीराम मंदिरात वसाकाचे ऊस उत्पादक सभासद, कामगार व प्राधिकृत मंडळ यांची संयुक्त विशेष सभा बोलविण्यात आली होती.अध्यक्षस्थानी कारखान्याचे मुख्य प्राधिकृत अधिकारी व आमदार डॉ. राहुल अहेर होते. या वेळी जिल्हा बँकेचे अध्यक्ष केदार अहेर, माजी कामगार संचालक विलास सोनवणे, कामगार युनियनचे अध्यक्ष अशोक देवरे, संतोष मोरे, जिल्हा बँकेचे संचालक धनंजय पवार, मविप्रचे संचालक अशोक पवार, देवळा बाजार समितीचे सभापती बापू देवरे, रामकृष्ण जाधव, विलास देवरे, राजेंद्र पवार, गोविंद पगार, प्रभाकर पाटील, कारभारी बिरारी, राजेंद्र देवरे, कुबेर जाधव, शशिकांत निकम, पंडितराव निकम, जेंद्र भामरे, डॉ. पोपटराव पगार उपस्थित होते.  

आमदार डॉ. अहेर म्हणाले, ‘‘राज्य सहकारी बँक व खासगी मालक यांच्यात समन्वय घालून ऊस उत्पादक आणि कामगारांना त्यांची देणी लवकरात लवकर प्राप्त करून देण्यासाठी प्रयत्न राहील.``

‘‘कारखाना खासगी तत्त्वावर चालविण्यास देत असताना समोरच्या व्यक्तीची क्षमता पाहून सभासदांचे, कामगारांचे हित जोपासले जाईल, असा निर्णय घेण्यात यावा, अशी सूचना केदार अहेर यांनी केली. दरम्यान, उपस्थितांनी मनोगताद्वारे कारखाना खासगी तत्त्वावर चालविण्यास देत असताना ऊस उत्पादकांना व कामगारांना योग्य न्याय मिळावा, अशी मागणी केली. कुबेर जाधव यांनी सूत्रसंचालन केले. या वेळी कसमादे परिसरातील ऊस उत्पादक, सभासद, वाहतूकदार, कामगार मोठ्या संख्येने उपस्थित होते.