कुलगुरू डाॅ. अशोक ढवण यांनी स्वीकारला पदभार

परभणी : वसंतराव नाईक मराठवाडा कृषी विद्यापीठाच्या १८ व्या कुलगुरुपदी बदनापूर (जि. जालना) येथील कृषी महाविद्यालयाचे सहयोगी अधिष्ठाता तथा प्राचार्य डाॅ. अशोक ढवण यांची नियुक्ती करण्यात आली आहे. डाॅ. ढवण यांनी शुक्रवारी (ता. एक) कुलगुरुंचा पदभार स्वीकारला. वसंतराव नाईक मराठवाडा कृषी विद्यापीठाचे कुलगुरू डाॅ. बी. व्यंकटेश्वरलू यांचा कार्यकाळ गुरुवारी (ता.३१) संपला. त्यामुळे राज्यपाल तथा कुलपतीचे विद्यासागर यांनी राव यांनी गुरुवारी (ता.३१) डॉ. अशोक श्रीरंगराव ढवण यांची वसंतराव नाईक मराठवाडा कृषी विद्यापीठाच्या कुलगुरुपदी नियुक्ती केली. डॉ. ढवण हे परभणी येथील कृषी महाविद्यालयाचे पदवीधर आहेत. त्यांनी नवी दिल्ली येथील भारतीय कृषी संशोधन संस्था येथून एम.एस्सी. (कृषी) आणि मृदा विज्ञान व कृषी रसायनशास्त्र या विषयात पीएचडी प्राप्त केली.  यापूर्वी त्यांनी वसंतराव नाईक मराठवाडा विद्यापीठाचे प्रभारी विस्तार शिक्षण संचालक, शिक्षण संचालक या पदावर कार्य केले आहे, त्यांना अध्यापन, प्रशासन प्रदीर्घ अनुभव आहे. डाॅ. ढवण यांच्या नियुक्तीमुळे मराठवाड्यातील शेती आणि शेतकरी यांच्या प्रश्नांची जाण असलेली व्यक्ती कुलगुरुपदी विराजमान झाली आहे. याबद्दल समाधान व्यक्त केले जात आहे. शुक्रवारी (ता. एक) डाॅ. अशोक ढवण यांनी कुलगुरुंचा पदभार स्वीकारला. या वेळी संशोधन संचालक डाॅ. दत्तप्रसाद वासकर, कुलसचिव डाॅ. गजेंद्र लोंढे, नियंत्रक विनोद गायकवाड, विविध महाविद्यालयाचे प्राचार्य, संशोधन केंद्राचे प्रभारी अधिकारी, विभाग प्रमुख, प्राध्यापक, कर्मचारी उपस्थित होते. सध्या ५० टक्के मनुष्यबळावर विद्यापीठाचा गाडा सुरू आहे. त्यामुळे सर्वांना दुप्प्ट कार्यक्षमतेने काम करावे लागेल. बीजोत्पादनातून विद्यापीठास मोठा महसूल मिळतो.२५ टक्के महसूल वाढविण्यासाठी सर्वांना प्रयत्न करावे लागणार आहेत. मराठवाडा विभागातील शेतकऱ्यांपर्यंत कोरडवाहू शेतीतील तंत्रज्ञान पोचवण्यासाठी विस्तार यंत्रणा सक्षम करण्यावर भर देणार आहोत. बोंड अळीचा प्रादुर्भाव रोखण्यासाठी जनजागृती मोहीम प्रभावीपणे राबविली जाणार आहे. कृषी विद्यापीठासोबत शेतकऱ्यांपर्यंत कृषी तंत्रज्ञानाचा प्रसार करण्यामध्ये अॅग्रोवनची भूमिका अत्यंत महत्त्वपूर्ण आहे. अॅग्रोवनकडून कृषी विस्ताराचे कार्य प्रभावीपणे सुरू आहे. - डाॅ. अशोक ढवण,  कुलगुरू, वनामकृवि, परभणी.