कोल्हापुरात भाजीपाल्याचे दर वधारले

कोल्हापूर : येथील कृषी उत्पन्न बाजार समितीत या सप्ताहात बहुतांशी भाजीपाल्याच्या आवकेत घट झाली. गेले आठवडा भर सातत्याने कोसळणाऱ्या पावसाने भाजीपाला उत्पादकांच्या वेळापत्रकात मोठा व्यत्यय आणला आहे. आवक कमी असल्याने काही भाज्यांच्या दरात गेल्या सप्ताहापेक्षा सुधारणा दिसून आली. सप्ताहात पावसापासून बचाव करून भाजीपाल्याचा दर्जा कायम राखण्यासाठी उत्पादकाला मोठे कष्ट घ्यावे लागले. सप्ताहात टोमॅटो, ढोबळी मिरची, हिरवी मिरची आवक मंदावली. टोमॅटोची सातशे ते आठशे कॅरेट इतकी आवक झाली. टोमॅटोस दहा किलोस १०० ते २५० रुपये इतका दर मिळाला.  वांग्याची दोनशे ते तीनशे करंड्या आवक झाली. वांग्यास दहा किलोस १०० ते ६०० रुपये दर होता. हिरवी मिरचीची दोनशे ते तीनशे पोती आवक होती. २०० ते ३०० रुपये दर मिळाला. गवारीच्या आवकेत घट कायम होती. गवारीची दररोज चाळीस ते पन्नास पाट्या आवक झाली. गवारीस दहा किलोस २०० ते २८० रुपये दर मिळाला. तर भेंडीची दर दहा किलोस १२० ते ३२० रुपये होता. भेंडीची शंभर ते दीडशे पाट्या आवक झाली. वरण्याची चाळीस ते पन्नास पोती आवक झाली. वरण्यास दहा किलोस ३०० ते ४०० रुपये दर मिळाला.  पालेभाज्यांमध्ये कोथिंबीरीच्या आवकेत काहीशी सुधारणा दिसून आली. कोथिंबीरीची आवक दहा ते बारा हजार पेंढ्या इतकी होती. गेल्या सप्ताहाच्या तुलनेत वीस ते पंचवीस टक्क्‍यांनी कोथिंबीरीची आवक वाढल्याचे बाजारसमितीच्या सूत्रांनी सांगितले. आवक वाढ झाली असली तरी मागणी कायम असल्याने दर वाढलेलेच होते. कोथिंबीरीस शेकडा ५०० ते २५०० रुपये दर होता. मेथीची सहा हजार पेंढ्या आवक झाली. मेथीस शेकडा ६०० ते १३०० रुपये दर मिळाला. पालक, पोकळ्यास शेकडा ७०० ते १५०० रुपये इतका दर होता.  आवक घटली या सप्ताहात पावसाने या भाजीपाल्याच्या काढणीत अडथळे आले. बेळगाव भागातही पाऊस सुरू असल्याने एकूणच भाजीपाल्याची आवक सरासरीच्या तुलनेत वीस टक्क्‍यांपर्यंत घटली होती. अजूनही पाऊस सुरू असल्याने पुढील आठ ते दहा दिवसांतही भाजीपाल्याची आवक फारशी वाढण्याची शक्‍यता कमी असल्याचे बाजारसमितीच्या सूत्रांनी सांगितले.