कवठेमहांकाळमधील तलावांत अत्यल्प पाणीसाठा

सांगली ः वरुणराजाच्या हुलकावणीमुळे ऐन पावसाळ्यातही कवठेमहांकाळ तालुक्‍यातील अकरा लघुप्रकल्प तलावांपैकी दोन तलाव कोरडे पडले आहेत. तर तीन तलावांत मृत पाणीसाठा आहे. तर उर्वरित सहा तलावांत अत्यल्प पाणीसाठा शिल्लक आहे. त्यामुळे तालुक्‍यातील बळिराजा दमदार पावसाच्या प्रतीक्षेत आहे.

म्हैसाळ उपसा सिंचन योजनेचे गत दोन ते अडीच महिन्यांपासून आवर्तन सुरू आहे. यामुळे या योजनेच्या लाभक्षेत्रातील गावच्या पिण्याच्या पाण्यासह शेतीच्या पाण्याचा प्रश्‍न मार्गी लागला आहे. परंतु तालुक्‍यात अजूनदेखील दमदार पाऊस झाला नाही. त्यामुळे पेरणी खोळंबली आहे. त्यामुळे शेतकरी चिंताग्रस्त झाला आहे. तालुक्‍यात तलावात पाणीसाठा अल्प प्रमाणात असल्याने शेतकऱ्यांची चिंता अधिक वाढू लागली आहे.

तालुक्‍यात अकरा प्रकल्प आहेत. त्यापैकी कुची, बोरगाव, येथील दोन तलाव कोरडे पडले आहेत. तर रायवाडी, हरोली, बसप्पावाडी हे तीन तलावांत अत्यल्प पाणीसाठा शिल्लक राहिलेला आहे. लांडगेवाडी या तलावात म्हैसाळ योजनेच्या पाण्यासाठी ६५९.९९ दशलक्षघन फूट मीटर इतका पाणीसाठा शिल्लक आहे. तर लंगरपेठ या तलावात टेंभू उपसा सिंचन योजनेचे पाणी आस्लायने ७५६.८३ दशलक्षघन फूट मीटर पाणी शिल्लक आहे. दरम्यान, म्हैसाळ योजना दोन महिन्यांपासून सुरू आहे. तालुक्‍यातील तलाव म्हैसाळ योजनेच्या आवर्तनातून भरण्यात येतील, अशी आशा शेतकऱ्यांत होती. परंतु अडीच महिने होऊनदेखील म्हैसाळ उपसा सिंचन योजनेचे पाणी सोडून भरण्यात आले आहेत. तर इतर तलावात पाणी भरण्यासाठी पाटबंधारे विभागाने दुर्लक्ष केले असल्याचे दिसते आहे.