विदर्भात उष्णतेची लाट ओसरली, चटका कायम

पुणे : दोन दिवसांपासून विदर्भात वारे वाहत आहे. त्यामुळे कमाल तापमानाचा पारा काहीसा खाली आल्याने विदर्भातील उष्णतेची लाट ओसरली आहे. मात्र, सरासरीपेक्षा अधिक तापमानाची नोंद होत असल्याने उन्हाचा चटका कायम राहणार असल्याचे हवामान विभागाने स्पष्ट केले आहे. विदर्भात आणि परिसरावर समुद्रसपाटीपासून नऊशे मीटर उंचीवर चक्राकार वाऱ्याची स्थिती आहे. तर मराठवाडा, मध्य महाराष्ट्राचा दक्षिण भाग ते लक्षद्वीप बेटापर्यंत हवेचा कमी दाबाचा पट्टा सक्रिय आहे. यामुळे विदर्भात (गुरुवारी) वर्धा आणि चंद्रपूर जिल्ह्यातील काही भागात दुपारनंतर अचानक ढग गोळा होऊन वादळी वाऱ्यासह पावसाने जोरदार हजेरी लावली. दरम्यान सकाळपासून वाऱ्यामुळे उन्हाचा ताप काहीसा कमी झाला आहे. शुक्रवारी सकाळी आठ वाजेपर्यंत विदर्भातील ब्रह्मपुरी, मराठवाड्यातील परभणी येथे सर्वाधिक ४४.३ अंश सेल्सिअसची तापमानाची नोंद झाली आहे. गेले काही दिवस सातत्याने ४५ अंशांवर असलेल्या चंद्रपूरचा पारा कमी ३९.४ अंशांवर घसरला होता. तर नागपूर येथील तापमानात मोठी घट होत ३७.९ अंश सेल्सिअस तापमानाची नोंद झाली आहे. चंद्रपुरात सरासरीच्या तुलनेत ३.६ अंश सेल्सिअस, तर नागपुरात ४.१ अंश सेल्सिअसने पारा उतरला आहे. मराठवाड्यात मात्र उष्णतेची तीव्रता टिकून आहे. तेथे कमाल तापमान ४० ते ४४ अंश सेल्सिअसच्या दरम्यान आहे. मध्य महाराष्ट्रात ३३ ते ४३ अंश सेल्सिअस, कोकणात ३३  ते ३६ अंश सेल्सिअस एवढे कमाल तापमान होते.  शुक्रवारी (ता. ४) सकाळी आठ वाजेपर्यंतच्या चोवीस तासातील कमाल तापमान (अंश सेल्सिअस) ः मुंबई (सांताक्रूझ) ३४.१, अलिबाग ३५.२, रत्नागिरी ३३.१, डहाणू ३५.९, पुणे ३८.४, नगर ४३.०, जळगाव ४२.८, कोल्हापूर ३७.०, महाबळेश्वर ३३.३, , नाशिक ३८.०, सांगली ३९.४, सातारा ४०.१, सोलापूर ४२.७, औरंगाबाद ४०.७, परभणी शहर ४४.३, नांदेड ४३.५, अकोला ४४.०, अमरावती ४२.८, बुलढाणा ४०.६, ब्रह्मपुरी ४४.३, चंद्रपूर ३९.४, गोंदिया ४०.८, नागपूर ३७.९, वाशिम ४२.६, वर्धा ४०.९, यवतमाळ ४३.०.