विदर्भात गुरुवारपर्यंत हलक्या पावसाचा अंदाज

विदर्भात गुरुवारपर्यंत हलक्या पावसाचा अंदाज
विदर्भात गुरुवारपर्यंत हलक्या पावसाचा अंदाज

पुणे : गेले काही दिवस उन्हाच्या तीव्र झळांनी होरपळणाऱ्या विदर्भाला काहीसा दिलासा मिळण्याची शक्यता आहे. गुरुवारपर्यंत (ता. १७) विदर्भात उष्णतेची लाट कायम राहणार असली तरी तुरळक ठिकाणी हलक्या पावसाचा अंदाज आहे. तर सोमवारी (ता. १४) मध्य महाराष्ट्रात हलक्या सरी पडणार असल्याचे हवामान विभागाने स्पष्ट केले आहे.  विदर्भामध्ये एप्रिल महिन्यात आलेली उष्णतेची लाट मे महिन्यातही कायम असून, चंद्रपूर, ब्रह्मपुरीसह अनेक ठिकाणी सातत्याने ४४ ते ४५ अंशांच्या आसपास तापमानाची नोंद होत आहे. उन्हाच्या झळांनी होरपळणाऱ्या विदर्भात शनिवारी (ता. १२) दुपारनंतर तुरळक ठिकाणी वादळी वाऱ्यासह हलक्या पावसाने हजेरी लावली. दरम्यान ढगाळ हवामानामुळे तापमानात एक ते दोन अंशांची घट झाल्याचे दिसून आले. विदर्भात गुरुवारपर्यंत हलका पाऊस पडण्याचा, तर उर्वरित महाराष्ट्रात मंगळवारपासून (ता. १५) मुख्यत: कोरड्या हवामानाचा अंदाज आहे.  अरबी समुद्राच्या अाग्नेय भागात २.१ किलोमीटर उंचीवर चक्राकार वारे वाहत असून, त्यांच्या प्रभावामुळे मंगळवारी (ता. १५) कमी दाबाचे क्षेत्र तयार होण्याचे संकेत अाहेत. रविवारी सकाळपर्यंतच्या २४ तासांमध्ये चंद्रपूर येथे यंदाच्या हंगामातील उच्चांकी ४६.६ अंश सेल्सिअस तापमानाची नोंद झाली. मराठवाड्यातील परभणी, नांदेड, विदर्भातील अकोला, अमरावती, ब्रह्मपुरी, नागपूर, वर्धा, यवतमाळ येथे तापमानाचा पारा ४४ अंशांच्या वर होता.  रविवारी (ता. १३) सकाळपर्यंतच्या २४ तासांमध्ये राज्यातील विविध ठिकाणचे कमाल तापमान (अंश सेल्सिअसमध्ये) : पुणे ३६.८, जळगाव ४३.४, कोल्हापूर ३२.५, महाबळेश्वर ३१.८, मालेगाव ४३.२, नाशिक ३६.८, सांगली ३५.२, सातारा ३७.९, सोलापूर ४२.०, मुंबई ३४.०, अलिबाग ३६.४, रत्नागिरी ३२.६, डहाणू ३५.६, औरंगाबाद ४१.४, परभणी ४५.६, नांदेड ४४.०, अकोला ४५.१, अमरावती ४४.८, बुलडाणा ४१.०, ब्रह्मपुरी ४५.१, चंद्रपूर ४६.६, गोंदिया ४३.३, नागपूर ४५.३, वर्धा ४५.९, यवतमाळ ४५.०.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com