विदर्भात किमान तापमानात ५ अंशांपर्यंत घट

पुणे  ः उत्तर भारतातील राजस्थान, उत्तर प्रदेश आणि मध्य प्रदेशच्या पूर्व भागात थंडीचा जोर वाढला आहे. त्याचा परिणाम लगतच्या विदर्भात दिसू लागला असून, किमान तापमानात पाच अंशांपर्यंत घट झाली आहे. रविवारी (ता. २६) सकाळी आठ वाजेपर्यंत विदर्भातील नागपूर येथे १०.४ अंश सेल्सिअस किमान तापमान नोंद झाल्याचे हवामान विभागाच्या सूत्रांनी सांगितले.    कोकण व मध्य महाराष्ट्राच्या काही भागांत हवामान ढगाळ असल्याने थंडीत चढउतार होत आहे. मराठवाडा व विदर्भात हवामान कोरडे असल्याने थंडी हळूहूळू वाढू लागली आहे. सध्या राज्यातील बहुतांशी भागांत सायंकाळी हवेत गारवा तयार होत आहे. त्यामुळे रात्रीचा किमान तापमानाचा पारा खाली उतरत आहे. परंतु पहाटे चांगलाच गारवा तयार होत असल्याने गुलाबी थंडीने नागरिकांना हुडहुडी भरीत आहे. त्यामुळे ग्रामीण भागातील नागरिक गरम ऊब मिळविण्यासाठी थंड पडलेल्या शेकोट्या हळूहळू पेटवू लागले आहेत. सध्या राज्यातील बहुतांशी भागांत किमान तापमान चार ते पाच अंशांपर्यंत घटले आहे. राज्यात हवामान कोरडे असल्याने थंडी वाढू लागली आहे. कोकणात काही भागांत किमान तापमान सरासरीएवढेच होते. तर अलिबाग, भिरा येथील किमान तापमानात सरासरीच्या तुलनेत एक अंशाने वाढ झाली होती. मध्य महाराष्ट्रातील पुणे, कोल्हापूर, महाबळेश्वर, मालेगाव येथील किमान तापमानात सरासरीच्या तुलनेत एक ते दोन अंश सेल्सिअसने वाढ झाली. तर जळगाव,  सातारा, नाशिक, सांगली, सातारा येथील किमान तापमान सरासरीएवढेच होते. तर सोलापूरमधील किमान तापमान सरासरीच्या तुलनेत तीन अंश सेल्सिअसने घटले. मराठवाड्यातील परभणी येथील किमान तापमानात सरासरीच्या तुलनेत सर्वाधिक ४ अंश सेल्सिअसने घट होऊन ११.६ अंश सेल्सिअसची नोंद झाली.औंरंगाबाद, नांदेड, उस्मानाबाद येथील किमान तापमान सरासरीच्या जवळपास होते. उस्मानाबादमध्ये सर्वांत कमी म्हणजेच १०.४ अंश सेल्सिअस एवढ्या किमान तापमानाची नोंद झाली. विदर्भातील गोंदिया, वर्धा, यवतमाळ येथील किमान तापमानात सरासरीच्या तुलनेत ५ अंश सेल्सिअसने घट झाली. नागपुरात ४ अंशांनी घट झाली. उर्वरित अकोला, अमरावती, बुलडाणा येथे किमान तापमान सरासरीच्या तुलनेत दोन ते तीन अंश सेल्सिअसने घटले. रविवारी (ता. २६) सकाळी आठ वाजेपर्यंतचे किमान तापमान व कंसात झालेली घट ः अंश सेल्सिअसमध्ये : मुंबई २०.२, अलिबाग २१.२ (१), रत्नागिरी २१.३, डहाणू २१.१ (१), भिरा १९.५ (१), पुणे १४.२ (१), जळगाव १३.६, कोल्हापूर १९.३ (२), महाबळेश्वर १९.३ (२), मालेगाव १४.६ (१), नाशिक १२.५, सांगली १६.६, सातारा १६.०, सोलापूर १४.५ (-३), उस्मानाबाद १०.४, औरंगाबाद १३.४, परभणी ११.६ (-४), नांदेड १४.५, अकोला १३.५ (-२), अमरावती १३.४ (-३), बुलडाणा १४.० (-२), चंद्रपूर १५.६, गोंदिया १०.६ (-५), नागपूर १०.४ (-४), वर्धा ११.०(-५), यवतमाळ ११.४ (-५).